Засега не се размислува за целосно затворање на угостителските објекти, вели Бектеши

Според министерот за економија, се прават анализи и доколку има потреба ќе биде донесен и петти и шести пакет економски мерки

Следниот ден откако ќе биде усвоен ребалансот на Буџетот, Министерството за економија ќе почне со реализација на мерките за финансиска поддршка согласно со четвртиот сет што го донесе Владата, најави министерот за економија Крешник Бектеши.

Во интервју за Алфа, министерот потенцира дека ребалансот на Буџетот не доцни и финансиската поддршка што ја предвидува Владата во четвртиот сет навреме ќе стигне кај најпогодените компании и граѓани.

Следниот ден откако ќе биде усвоен ребалансот на буџетот, како што најави Бектеши,Министерството за економија ќе ги објави сите мерки што се негова надлежност, посебно за најпогодените сектори, како што се туризмот, хотелиерството, угостителите, занаетчиите. Владата, вели, е подготвена да продолжи со нови мерки и по декември, доколку има потреба за тоа, се со цел најпогодените сектори да продолжат да работат.

Ребалансот на Буџетот чека усвојување во Собранието: Со него ќе почнат и мерките од четвртиот пакет

„Што се однесува до угостителството, и во Кризниот штаб и во Економскиот совет и ние како Министерство за економија во моментов не размислуваме за целосен карантин, односно целосно затварање на овој сектор, но тоа ќе зависи од бројот на заразени и од епидемиолошката слика во државата. Секако доколку се случи тоа, ние ќе излеземе дополнително во пресрет на туристичко-угостителскиот сектор како што и беше досега, бидејќи тие беа и се опфатени во сите четири сета економски мерки што ги донесе Владата“,
истакна Бектеши и додаде дека доколку има дополнителни рестриктивни мерки за овој сектор, тогаш секако дека ќе бидат донесени нови мерки за поддршка.

Нови правила за угостителските објекти: Забрана за гостување на музичари и најмногу до четворица на иста маса

Наведе дека се прават анализи и дека доколку има потреба ќе биде донесен и петти и шести пакет економски мерки.

Бектеши потенцираше дека следат тешки денови за економијата, но сепак оптимизам влеваат податоците од Државниот завод за статистика според кој се намалува падот на индустриското производство споредено со податоците од вториот квартал. Тоа, според Бектеши, покажува деа мерките што ги донесе Владата биле во вистинска насока.