ЦУК се мобилизира по владината одлука за прогласување кризна состојба на целата територија на државата во траење од 30 дена
Откако Владата ја донесе одлуката за прогласување кризна состојба на целата територија на државата во траење од 30 дена, поради ситуацијата со ковид -19, вечерва заседавал и Главниот штаб за управување со кризи при Центарот за управување со кризи.
Со Главниот штаб раководел директорот на ЦУК Стојанче Ангелов, а присуствувале претставници на субјекти во системот за управување со кризи, од министерствата за внатрешни работи, за здравство, за транспорт и врски, за одбрана и за надворешни работи и раководителот на Групата за процена, како и раководителот на Итна медицинска помош во Скопје, директорот на Дирекцијата за заштита и спасување, како и претставници на Армијата, на Агенцијата за разузнавање, Дирекцијата за безбедност на класифицирани информации и Црвениот крст.
За утре е договорен нов состанок на Главниот штаб при ЦУК, за подготвување нацрт акциски план за дејствување.