Бугарија наскоро ќе донира вакцини за Северна Македонија, кога ќе имаме доволно количества од ЕУ, најави бугарската вицепремиерка и министерка за надворешни работи, Екатерина Захариева во гостувањето во емисијата „Лице в лице“ на БТВ.
Околу тоа зошто не донирала Бугарија досега, туку тоа го направи Србија, Захариева посочува дека проблем е тоа што се доцнело со испораката и преку Ковакс механизмот.
„Сега започнува редовното снабдување со вакцини од страна на ЕУ и се надевам дека наскоро ќе ја имаме оваа можност. Бугарија наскоро ќе достави вакцини во Северна Македонија“,
вели Захариева.
Владата во Софија на седница во декември 2020, на која присуствуваше и министерот Венко Филипче, договори дека Бугарија од секоја набавка на вакцини против ковид-19 ќе одвојува дел за нашата земја, како донација.
Покрај за вакцините, Захариева во телевизиското гостување зборува и за спорот помеѓу двете држави и порачува дека мора да се најде решение, како и тоа дека прво треба односите да се вратат во нормала.
За Акцискиот план рече дека се разгледува од бугарска страна, откако претходно Бугарија испратила, а Северна Македонија дала повратен одговор. Во таа насока, го коментираше и тоа што нема железничка пруга меѓу двете соседни држави и информациите од македонска страна дека има многу заинтересирани фирми за нејзина изградба.
„Дај Боже, да има многу кандидати и да се изгради Коридорот 8, не е нормално да нема железничка врска меѓу двете земји“,
вели Захариева.
На крајот од нејзиното гостување таа испрати порача дека двете држави мора да се пронајдат решение, а начин за тоа е да се намалат емоциите.
.„Осудени сме да успееме“,
категорична беше Захариева.