Министерката за надворешни работи на Бугарија, Екатерина Захариева, денеска гостуваше во утринската емисија на БТВ, каде што повторно го даде своето мислење за европската интеграција на Македонија.
„Ниту една земја членка на ЕУ ниту, пак, САД можат во иднина да ја притиснат Бугарија да попушти и да дозволи пристапни преговори на Северна Македонија со ЕУ. Тие треба да разберат дека Европската Унија не функционира како Југославија. Никој не може нам да ни наложи што да правиме во Унијата“,
рече Захариева за БТВ.
Османи и Захариева вчера се сретнаа во Софија, каде што разговараа за акцискиот план за меѓусебна соработка и можноста за неговата финализација, во функција на договарање на втората меѓувладина конференција меѓу владите на двете земји.
Таа истакна дека на средбата со македонскиот министер за надворешни работи било разговарано за фактот дека нема напредок во мешовитата комисија, при што нагласи дека има повлекување во однос на петте историски личности за кои веќе комисијата постигнала договор.
„Ова е еден од најголемите спорови. Ова се текстови што треба да бидат вклучени во учебниците. Изјавата дека Комисијата се согласила за средниот век не е точна. Важно е да се продолжи дијалогот, важно е да имаме напредок таму каде што можеме“,
додаде таа.
Заедничката мултидисциплинарна македонско-бугарска експертска комисија за историски и образовни прашања денеска треба да одржи состанок на кој се очекува теми да бидат записникот од десеттата средба, учебниците за седмо одделение кај нас, како и прашањето за ликот и делото на Гоце Делчев.
Захариева и Османи разговарале и за пречките во изградбата на Коридорот 8.
„Разговаравме и за Коридорот 8, за кој беше прекината јавната набавка. Причините што ми ги даде министерот Османи беа валидни, но тие треба да повторно да ја распишат таа јавна набавка што е можно побрзо. Коридорот започнува од Италија и тој е т.н. коридор на НАТО“,
нагласи Захариева.