За тоа дали има преговори со други партии за нова коалиција, лидерот на СДСМ вели дека засега имаат преговори со нивните стандардни коалициски партнери и со некои од партиите што не биле досега со нив во коалиција
Лидерот на СДСМ, Зоран Заев, денеска во Неготино изрази уверување дека законите ќе се донесат, дека Собранието навреме ќе се распушти, а предвремените парламентарни избори ќе се одржат на 12 април. Тој исто така кажа дека коалицијата со ДУИ функционира.
„Парламентот не смее да дозволи со какви било игри, со какви било планови да се наруши процесот на дискусија – деловничкото право на пратениците и на крајот правото да се изгласаат законите. Може ќе има две третини, може и ќе нема две третини, но ред е, и фер е, и чесно е пред државата да дадеме шанса да се изгласаат овие важни закони“,
рече Заев.
Одговарајќи на новинарско прашање, Заев рече дека коалицијата со ДУИ функционира.
За тоа дали има преговори со други партии за нова коалиција, Заев вели дека засега имаат преговори со нивните стандардни коалициски партнери и со некои од партиите што не биле досега со нив во коалиција.
„Разговараме. Верувам дека ќе имаме конечни резултати од овие разговори покрај анализите што ги правиме, а и разговорите со нив кои се многу важни да имаме и програмски заеднички определби некаде на крајот на февруари месец“,
рече Заев додавајќи дека ниту сакаат ниту планираат формирање мнозинство кое, како што рече, секако е изводливо.
„Знаете дека е возможно да го направиме, заради тоа што обезбедивме преку 80 пратеници, а не па мнозинство од 61 пратеник. Тоа е возможно. Не сакам ова никој да го сфати како закана. Но, испраќам како порака дека тоа што е државата е државата пред сè и над сè за сите нас. Потоа се нашите партии, политички калкулации или слично. Ние сакаме да имаме избори на 12 април, сакаме навреме да се распушти парламентот, но истовремено сакаме парламентот да си ја заврши работата онака како што е планирано – законските решенија да се гласаат во парламентот“, рече Заев.
Коментирајќи ја изјавата на генералниот секретар на партијата Љупчо Николовски, тој рече со неговиот настап испратиле сериозна порака за одговорност пред државата.
„Сериозноста на пораката од генералниот секретар Љупчо Николовски беше, како што јас ја сфатив, а ја сфативме и сите, да престанат игрите што се играат во парламентот, за државата се работи“,
рече Заев.