Во Северна Македонија постојат и услови и потреба за унапредување на соработката меѓу власта и опозицијата, му посочил Заев на Донал Туск, поранешниот претседател на Европскиот совет
Има услови и потреба за унапредување на соработката меѓу власта и опозицијата во Северна Македонија, посочил премиерот Зоран Заев , на денешната средба во Атина со Доналд Туск, претседател на Европската народна партија и поранешен претседател на Европскиот совет.
Заев, како што соопштија од Владата, потенцирал дека политичкиот дијалог секогаш носи решенија и во таа насока потврдил дека во Северна Македонија постојат и услови и потреба за унапредување на соработката меѓу власта и опозицијата, пред сѐ заради тоа што граѓаните, како што се наведува, очекуваат заедништво и сплотеност на политичките партии кога се во прашање иднината на земјата и интересот на народот.
Заев ја искажа својата благодарност до Туск за неговата поддршка за Северна Македонија за време на склучувањето на Договорот од Преспа, како и за охрабрувањата што тој ги упатуваше на македонски јазик до граѓаните во тој период.
Премиерот го известил Туск дека Владата во Северна Македонија останува силно посветена на реформите во сферата на правната држава, борбата против корупцијата и криминалот, на справувањето со пандемијата, на развојот на економијата и на европските интеграции и дека ќе продолжи политичкиот дијалог со сите чинители со цел обезбедување уште подобри резултати на овие теми.
Туск, пак, како што посочуваат од Владата, уште еднаш му потврдил на Заев дека тој и Европската народна партија остануваат да бидат посветен пријател и поддржувач на европската перспектива на Северна Македонија и дека ќе бидат вложени дополнителни напори за поддршка на земјата, со цел што е можно поскоро отпочнување на процесот на преговорите.
Поврзани вести:
Заев – Мицотакис: Грција секогаш ќе биде сојузник на С Македонија
Заев од Атина: Со Грција ја отстранивме пречката за членството во НАТО, ќе има решение и со Бугарија
Заев на средба со Тони Блер, разговарале за соработка и инвестиции во ИТ секторот