Со креативен пристап е можно одржување на првата меѓувладина конференција на Северна Македонија со ЕУ за време на португалското претседателство, се надеваат премиерот Зоран Заев и италијанскиот амбасадор во земјава, Андреа Слвестри.
Двајцата денеска имале средба во Владата на која, како што соопштија од прес-службата, изразена е силна поддршка од Италија за евроинтеграциите на земјава.
„Продолжуваме со реформите дома, со силна посветеност кон функционална правна држава. Во однос на разговорите со нашиот сосед, Република Бугарија, продолжуваме со конструктивноста во разговорите. Тоа што го соопштивме и во Брисел е дека прифаќаме да разговараме за сè освен за тоа кои сме“,
рекол Заев на средбата.
Од Владата по средбата порачуваат дека е важно каква порака ќе испрати ЕУ до земјите од Западен Балкан односно дали останува фокусирана на прашањето за проширувањето.
Премиерот и италијанскиот амбасадор разговарале и за други теми, меѓу кои и работата на Собранието.
„На средбата е заеднички оценето дека функционален Парламент е од полза за граѓаните и за напредокот на државата, поради што е потребна конструктивност од сите политички субјекти. Премиерот Заев изрази благодарност до Република Италија и до ЕУ за солидарноста околу вакцините. Заеднички е констатирано дека солидарноста е еден од клучните начини за справување со последиците од пандемијата, што е во полза на сите“,
велат од Владата.