Државните институции навистина покажаа капацитет да организираат вака специфични избори, со почитување на сите здравствени протоколи, рече лидерот на СДСМ
Од денешната одлука на граѓаните зависи кој ќе води грижа за здравјето на граѓаните, кој ќе ги отвора и затвора поглавјата со ЕУ, но уште поважно кој ќе се грижи за економскиот раст и развој на сите граѓани во Северна Македонија, изјави лидерот на СДСМ, Зоран Заев, откако на избирачкото место во Струмица го оствари своето гласачко право.
„Државните институции навистина покажаа капацитет да организираат вака специфични избори, со почитување на сите здравствени протоколи, што треба да биде сериозно охрабрување за граѓаните да излезат во максимален број и да ѝ дадат правец на државата, преку својот глас и својата определба за да продолжиме напред по патот по кој чекориме“,
рече Заев, кој е носител на листата на коалицијата „Можеме“ во четвртата ИЕ и кандидат за премиер.
Заев нагласи дека овие избори се поразлични од сите претходни, но, како што рече, не се помалку важни.
„Верувам дека преку нашата позитивна и промотивна кампања успеавме да ги убедиме граѓаните дека коалицијата предводена од СДСМ е таа што заслужува најголемата поддршка. Таа чест и одговорност, посебно во времето во кое живееме, е неповторлива шанса бидејќи се отворени сите патишта за нашата земја“,
рече Заев.