Заев вели дека секоја одлука ќе се почитува, но дека ќе му биде драго ако земјава добие дополнителен рок за да ги исполни препораките на УНЕСКО и да избегне поместување на Листата на светски богатства во опасност
Предлогот Охрид да добие уште две години стигна од БиХ, но гласањето било одложено поради негодување од Норвешка
Каква и да биде одлуката за Охридскиот регион, ние ќе ја почитуваме. Но, ќе ни биде драго ако добиеме дополнителен рок, бидејќи не е во ред светот да води грижа за Охрид, туку пред се, треба ние да водиме и верувам дека ќе успееме, вели премиерот Зоран Заев во пресрет на одлуката за Охридскиот регион за тоа дали ќе се најде на Листата на светско наследство во опасност или државата ќе добие дополнителен рок за имплементација на препораките од УНЕСКО.
Заев вели дека одлука се очекува да има до попладнево. Посочи дека благодарение на, како што вели, постигнатите резултати за зачувување на Статусот на Охридскиот регион, Македонија го свртела вниманието на експертите кои треба да донесат одлука.
„Тоа што е уништено со децении наназад под раководство на ВМРО-ДПМНЕ не може да се врати во нормала за мал период. Одлуката ни беше најавена тоа беше дека Охридскиот регион ќе биде ставен на Листата на светски богатства во опасност. Но, благодарение на градоначалникот и општинската администрацијата, со сите аргументи кои беа изнесени и од Министерството за култура и мојот кабинет, кои се во постојана дебата вчера и денеска, навистина се менува сликата заради тие резултати што досега се постигнати. Пред се мислам на изградбата на колекторскиот систем, ставање на режим на планот за управување со Охрид, чистењето на плажите…Благодарение на тие резултати го свртивме вниманието на сите експерти којшто дискутираат на заседанието на УНЕСКО и се уште се дискутира,“
вели Заев.
Заев рече дека е задоволен од досегашните резултати и дека градот и понатаму ќе се развива. На прашањето дали лобирал за државата да добие дополнителен рок за да ги исполни препораките на УНЕСКО, премиерот вели дека за тоа одлучуваат експерти, а не политичари.
„Таму нема политика. Северна Македонија во овој период испрати многу силни меѓународни пријатели, но таму се исклучелно експерти и професионалци. Норвешка на пример, го води целиот овој проект и е најгласна, но не може Заев да се јави на премиерката на Норвешка. Тоа не функционира така. Врз основа на докази, врз основа на сето тоа што е направено, дебатата е отворена. Вчера траеше цел ден и денеска после пладне се очекува одлука. Но, задоволен сум што го свртивме вниманието и гледам дека се работи. Тоа е мотивација за нас,“,
вели премиерот.
На прашањето дали доколку се донесе одлука Охридскиот регион да биде впишан на Листата на светско наследство во опасност ќе се бара одговорност, Заев вели дека целта не е да се отвораат судски постапки, туку да се извлечат поуки.
„Одговорноста не можете да ја лоцирате, ниту во нашите, ниту во меѓународните закони, заради тоа што тоа низ времето е дозволено се. На крајот државите немаат за цел да санкционираат или да отворат постапки судски, правни, или какви било. Главната цел е да не се повтори тоа што го довело Охрид, Охридското Езеро и охридското крајбрежје и целиот заштитен регион за да воопшто се дискутира тоа. Да ни биде поука и да учиме. Охрид, нашето прекрасно Охридско Езеро треба да го чуваме такво какво што природата и Господ ни го дариле. И верувам дека ќе успееме во тоа, а притоа да се развиваме и токму поради неговата посебност да биде атракција“,
рече премиерот.