Премиерот Зоран Заев најави дека 14 решенија за нови директори се донесени, а до следниот вторник, кога владата ќе има редовна седница, ќе се донесат уште најмалку десетина нови одлуки.
„Точно 14 одлуки се донесени и верувам дека уште најмлаку десетина треба да се донесат. Не е само за тоа кој се разрешува, треба да разговарате со потенцијалните кандидати за уште еднаш да погледате дали се исполнети условите , дали се нафаќаат на одредена одговорна позиција или не. Штом ќе ги завршиме овие разговори ќе ги соопштиме и одлуките зашто на крајот за еден дел од одлуките премиерот е предлагач, владата носи одлука, а за друг дел од одлуките самите министри поставуваат кадри со решенија за раководители на одредени институции. Одлуките ги носиме заедно како одговорни во политичката влада“,
изјави премиерот Заев.
До вторник за кога и премиерот најави дека ке има одлуки за десетина нови директори, коалицискиот партнер на Заев, ДУИ, ќе врши анализа на работата на актуелните функционери.
„ДУИ врши анализа на работата на јавните функционери од нејзините редови и во добро дефинирана динамика ќе почне процес на реконструкција и реорганизација за оние позиции за кои ќе процени дека е потребна смена“,
изјави портпаролот на ДУИ, Бујар Османи.
Во врска со случајот „Рашковски“, премиерот денеска изјави дека засега не гледа одговорност на Генералниот секретар на владата, но дека ќе биде разрешен ако се утврди прекршување на законот.