Премиерот Зоран Заев денеска се сретна со претставници на оштетените граѓани од стечајот на Еуростандард банка. Заедно со вицепремиерот за економски прашања, Фатмир Битиќи, тие на состанокот размениле предлози за надминување на состојбата во која се затекнати граѓаните.
„На состанокот се споделени некои од проблемите со коишто се соочуваат оштетените граѓани, физички и правни лица, по пропаѓањето на Еуростандард банка и се слушнати предлозите од Иницијативниот одбор на оштетените граѓани, за можни решенија. Премиерот Заев најави дека предлозите ќе бидат разгледани од страна на институциите и дека претставниците на Иницијативниот одбор ќе добијат повратна информација“,
информираат од Владата.
Од опозициската ВМРО-ДПМНЕ пак велат дека Заев не може да биде решение за проблемот на оштетените граѓани.
„Еуростандард банка е 200 милиони евра тежок скандал, а Заев човекот кој не спречи пропаѓање на банка сега не може да биде дел од решението. Јавноста очекува одговори која е таа струмичка компанија блиска до власта која добивала кредити без покритие од банката? Како се користени тие пари? Каде завршувале и зошто нема одговорност за министерката на Заев Нина Ангеловска која пред време си ги извлекла парите? Потребна е кривична одговорност за министрите и раководителите на институции директно одговорни за аферата?“,
се вели во соопштението на партијата.
Тие повикуваат и на одговорност што стотици луѓе остануваат без работа и над 100 илјади луѓе со блокирани сметки.