Ќе се прошируваат бизнис релациите меѓу С.Македонија и Грција со цел создавање можности за развој на компаниите и на економиите на двете земји.
Ова денеска го разговарал премиерот Зоран Заев со претставници на грчката бизнис заедница во земјава. Заев заедно со заменикот на претседателот на Владата за економски прашања, Фатмир Битиќи, се сретна со Арис Влахос, претседател на Грчката бизнис асоцијација во Скопје и со претставници од Асоцијацијата, во којашто членуваат големите грчки компании, коишто работат во државава.
Тие оцениле дека постојат реални услови за свој придонес да даде Грчката бизнис асоцијација во Скопје. Во таа насока разгледани се и некои конкретни иницијативи, како што е реафирмација на иницијативата за избегнувањето двојно оданочување, како можност за придобивки за двете страни.
„Претстои период во којшто граѓаните од нашите две држави ќе почувствуваат бенефити од зацврстените пријателски односи. Тоа е возможно преку економијата и активно ќе соработуваме со нашиот стратешки партнер Грција“,
рече премиерот Заев.
Заеднички е ставот дека е дојдено време кога граѓаните на двете земји да почувствуваат и економски бенефити, по Договорот од Преспа, низ ефикасна соработка помеѓу компаниите и бизнис заедниците од државите, како на билатерално, така и на регионално ниво.