Лидерот на СДСМ, Зоран Заев, денеска учествуваше на панел-дискусијата „Пристапување во ЕУ на Западен Балкан: Кредибилност, предвидливост и политичко водство“, во рамки на Економскиот форум Делфи што се одржува преку видеоконференција во Атина.
На панелот учествуваа и еврокомесарот за проширување Оливер Вархеји, премиерите на Србија и на Албанија, Ана Брнабиќ и Еди Рама, а преку видеопорака на форумот се обрати и српскиот претседател Александар Вучиќ.
„Договорот од Преспа е добар знак иднината на цел Балкан. Сега е време за да ја зајакнеме соработката и да ја зголемиме меѓусебната доверба. Верувам дека сите наши соседни земји што се членки на ЕУ се многу посветени за европската иднина на Западен Балкан“,
порача Заев.
Лидерот на СДСМ ја истакна европската агенда на земјава и најави уште чекори, не само поради исполнување на критериумите за членство во ЕУ туку првенствено за подобрување на животот на граѓаните.
„Среќен сум што за време на мандатот на еврокомесарот Вархеји добивме историска одлука по 15 години за почеток на преговори. Сметам дека новата методологија ќе биде фер шанса за сите нас и ако сме навистина посветени ќе имаме повеќе отворени поглавја и повеќе постигнувања“,
рече лидерот на СДСМ.
Истакна дека форумот Делфи дава добра можност за зајакнување на соработката меѓу земјите од регионот, не само за Србија, Албанија и Северна Македонија туку и за останатите земји од Западен Балкан, изразувајќи надеж оти набрзо ќе станеме полноправни членки на ЕУ.