Бурата од реакции и изјави поврзани со ставот на Бугарската академија на науките (БАН) дека македонскиот јазик е дијалект на бугарскиот, не стивнува ниту денес. Премиерот Зоран Заев порача дека е недозволиво во 21. век да се зборува за јазикот, а лидерот на опозицијата, Христијан Мицкоски, пак, најави дека ќе ја реактивира иницијативата во Собрание за носење резолуција за заштита на македонскиот јазик.
Заев денеска одговарајќи на новинарски прашања најави и средба со премиерот Бојко Борисов која би требало да се одржи на почетокот на 2020 година на која, како што рече, ќе разговараат отворено и пријателски, а не да се префрла, кој прв кажал нешто.
„Ние сме пријателски земји и ваквите дисонантни тонови се недозволиви каде што во 21 век зборуваме за идентитет којшто е впишан целосно во сите анали, во сите документи и во сите меѓународни организации. Јас го добив аплаузот и од бугарските пратеници кога зборував на македонскиот јазик во Европскиот парламент“, истакна Заев.
Премиерот потсети и на Договорот што е потпишан за соработка и пријателство со Бугарија кој е на три јазици, и дека тој е потпишан согласно Уставот, односно на македонскиот јазик.
Претседателот на ВМРО-ДПМНЕ, Христијан Мицкоски, пак, преку социјалните мрежи се огласи за негирањето на македонскиот јазик од бугарска страна, а на Заев му порача дека со полусрамежливо кажување дека БАН не е во право, нема да спречи вакви и други тенденции во иднина.
Затоа, најави дека ќе бара Собранието да донесе резолуција за заштита на македонскиот јазик.
„Јас пред два месеци дадов иницијатива, и сега ќе ја реактуелизирам во македонското Собрание да донесеме заедничка резолуција по пат на консензус за заштита и потврдување на посебноста и автенткчноста на македонскиот јазик. Впрочем, таквата резолуција нема да значи никаква претензија, туку потврда за нашето и испраќање на политичка порака дека како држава сепак имаме кичма и свој јазик различен од сите други, по кои се препознаваме и разликуваме од останатите“, наведе Мискоски.
Тој го повика и премиерот да се изјасни за оваа револуција.