Извештајот на УНЕСКО за Охридскиот Регион треба да се прими како силен аларм за состојбата, рече премиерот Зоран Заев денеска на седницата за пратенички прашња одговарајќи му на пратеникот Сурија Рушиди од Алијанса на Албанците.
Заев рече дека не може да се очекува да дојде УНЕСКО и да ни води грижа за целиот Охридски Регион, туку тоа е и треба да биде обврска, на институциите, на централните и локалните власти, но и на граѓаните.
„Ќе продолжиме понатаму со сите активности како што се отстранување на бесправно изградени објекти, средување на природниот тек и аспект на поставување на плажите околу Охридското Езеро, ќе продолжиме со доизградба на Колекторскиот систем, прочистителните станици кои во минатото се уништени и сето она што значи нормален развој согласно планот за управување со Охридското Езеро и Охридскиот Регион“,
рече Заев.
Додаде дека без разлика каква ќе биде одлуката на УНЕСКО во јули и дали Охридскиот Регион ќе се најде на листата на светски наследства во опасност, извештајот треба да се прифати како реалност.
„Владата преку Министерството за транспорт и врски работи детален план за целото крајбрежје на Охридскиот Регион и го финансира со цел тука рака да стави централната власт и државните институции, а не да биде на локалните самоуправи заради тоа што тоа е наше национално богатство кое треба дополнително сите заедно да го заштитиме. Со години, децении не се направило ништо во полза на заштита на Охридскиот Регион, напротив се правело како да се наштети работејќи спротивно на законите и на сето тоа што се препораки согласно УНЕСКО“,
рече Заев.
Тој ги охрабри локалните самоуправи од овој регион да продолжат со постапката на отстранување на бесправно изградените објекти.
„Свесни сме за ризиците и за можноста Охридското Езеро и Охридскиот Регион да биде прогласен за подрачје во опасност, свесни сме дека предизвикува горчина кај сите граѓани и сите засегнати институции, заедници, чинители. Верувам дека сето тоа што е почнато може да даде само прилог во идните наши очекувања на тргање на сите забелешки кои УНЕСКО ги има за Охридскиот Регион. Охридско-струшкиот регион мора во иднина да продолжи да го подобрува квалитетот на животот на граѓаните, да го формира владеењето на правото и во духот на Законот за управување со Охридскиот Регион. Факт е дека С Македонија потфрлила, потфрлиле и централните и локалните институции во минатото, но и денеска има факти на кои се работи и даваат конретни резултати, за кои се потрошија милиони евра. Тоа се случува од 2018 година наваму за прв пат во заштита на УНЕСКО, иако потребни се експертизи и финансии и многу работа и грижа од институциите, од граѓаните и граѓанскиот сектор“,
рече Заев.