Со барањето од опозицијата тие да го предлагаат јавниот обвинител, Мицкоски испраќа порака дека има намера да остане во опозиција. Вака критички да се настапи за закон кој е во координација со Европската делегација, ЕУ и САД е далеку од каква било нормалност во однесувањето во вакви сериозни моменти пред кои сме исправени. Испраќам порака на сериозност – сега сите ѝ требаме на државата, изјави денеска претседателот на СДСМ, Зоран Заев, коментирајќи ја прес-конференцијата на лидерот на ВМРО-ДПМНЕ, Христијан Мицкоски.
Тој рече дека изјавата на Мицкоски дека нема да учествуваат во преговорите за законот за јавно обвинителство доколку не се прифатат нивните забелешки и предлози е резултат на инструкциите што доаѓаат од Будимпешта.
За предлог-законот, Заев рече дека е направен со цел политичарите да не местат обвинители, туку да биде структурно и системско решение далеку од рацете на политичарите и во функција на јакнење на независноста и реформите во правосудството, а не обид да се амнестираат случаи и да се скрие криминал на актуелната власт.
„Со законот се гарантираат сите актуелни случаи, отпочнати предистраги, истраги, судски процеси и слично, без разлика за кого се однесуваат, вклучително и предметите од СЈО, но и од Обвинителството за организиран криминал и тоа сегашни, минати, а веројатно и идни предмети. Ако ВМРО-ДПМНЕ е за вакво решение, јавно ги повикувам, а веројатно тоа ќе го направи и министерката за правда како лидер на работната група од наша страна, уште утре да седнат работните групи и веднаш да разговараат за сè да решиме во функција и интерес на граѓаните. Во спротивно, останува само политиканство и сериозна потврда дека некој постои и функционира само за да го забошоти криминалот и да ја спречи одговорноста за криминалот, без разлика за кого се однесува“, рече Заев одговарајќи на новинарско прашање при денешната посета на МАСИТ.
*Поврзана вест
Мицкоски е подготвен за преговори, но не и за компромиси за јавното обвинителство