Премиерот Зоран Заев очекува Апелацискиот суд да ја образложи одлуката со која ги укина пресудите во предметот „Титаник 2“ за изборни нерегуларности и со која го врати овој предмет на повторно одлучување во првостепениот суд.
Со одлуката на Апелација се укинуваат пресудите изречени за ексдиректорот на УБК, Сашо Мијалков, лидерот на ДПА, Мендух Тачи, како и четворица поранешни членови на Државната изборна комисија, поради суштествени повреди на постапката поради кои првостепената пресуда се смета за незаконита и неправилна.
Како што изјави Заев, и неговиот мандат како градоначалник на Струмица бил загрозен од одлуката на ДИК во 2013 година за време на локалните избори.
„Јас тогаш бев градоначалник и морав да одам во втор и во трет круг. Ме интересира зошто Апелација донесе таква одлука и што е причина што го враќа предметот на повторно судење, како што ги интересира сите граѓани. Верувам Апелација ќе даде образложение. Сакам да знам како се донесени одлуките“,
изјави Заев.
Во контекст на одлуката на Апелација, Заев рече дека е неопходно прочистување во правосудството. Тој посочи дека не станува збор за ветинг, туку за процес кој ќе може да се спроведе преку постоечките институции како Судскиот совет и Антикорупциска комисија.
„Тоа не е ветинг, во Албанија прават ветинг. Нам ни треба едно прочистување, од сите чесни судии и обвинители да се одделат нечесните, оние што имаат судир на интереси или недозволива имотна состојба и индикативно потекло на имот, кои не треба да работат. Само процесот на прочистување ќе го даде резултатот. Друго што преостанува е да се кандидирам за шеф на правосудството“,
рече Заев на шега.
Според Заев, прочистувањето би се одвивало преку проверка на потеклото на парите, имотот и капиталот на судиите и обвинителите.
„Мора работите да се менуваат, горчината од неправдата ги погодува граѓаните, ги одвраќа инвеститорите и ги разочарува младите. Не треба да се чекаат избори за да почне прочистувањето. Судскиот совет може да почне и да проверува согласно Законот за Судски совет и Законот за судовите. Антикорупциска исто така треба од јануари да почне програма за прочистување на правосудството“,
додаде Заев.
*поврзани вести Заев: Прочистување во правосудството ќе прават институциите, тоа не е ветинг
*поврзани вести Каков „ветинг“ во судството е можен во македонски услови?