Премиерот Зоран Заев потврди дека снимените разговори со руските комичари се автентични, освен делот кој се однесува на МПЦ-ОА каде имало интервенции.
Набројувајќи ги сите познати личности кои биле мета на двоецот од Русија, тој истакна дека нивни жртви биле и францускиот претседател Емануел Макрон, на Турција, Реџеп Тајип Ердоган, ген-секот на НАТО, Јенс Столтенберг.
„Штом тие паднале, тогаш јас сум задоволен штом сум во такво друштво“,
рече Заев.
Тој смета дека имајќи го предвид искуството, цели на рускиот двоец биле личности кои предводат држави кои се членки или аспиранти за НАТО и за ЕУ.
„Станува збор за манипулација и пласирање лажни вести и информации, за кои ќе биде поведена сериозна акција, во партнерство со нашите пријатели од НАТО и од ЕУ за нивно натамошно спречување“,
вели Заев.
Заев појасни дека од разговорите се забележува дека тој го користи истиот речник кој постојано и јавно и во официјална комуниакција го користи.
Тој и се извини за јавноста за непријатностите и изрази жалење за откривањето на телефонските броеви на Вес Мичел и на Рамуш Харединај, но истакна дека во ниту еден од разговорите не обелоденува какви било безбедносно сензитивни информации.
„Жртва сум на мојата отвореност и мојата постојана достапност. На отворена линија сум секогаш со нашите стратешки партнери и граѓаните“,
рече Заев на прес-конференција во Владата.
Во однос на одговорноста, премиерот посочи дека со оглед дека нема никаква причинета штета, не постои простор за такво нешто.