Иако на доаѓањето во Македонија потпишал дека ќе биде во задолжителна самоизолација, жител на Арачиново сепак не ја испочитувал мерката и го прекршил законот. Основното јавно обвинителство Скопје му предложи на судот на обвинетиот да му изрече парична казна од 100 дневни глоби, при што висината на една дневна глоба да биде одредена во износ од 20 евра. Обвинетиот се товари за кривично дело – непостапување според здравствените прописи за време на епидемија од член 206 став 1 од Кривичниот законик.
„Обвинетиот, при влез на граничниот премин Табановце на 17 март, доаѓајќи од Швајцарија како ризична земја за ширење на коронавирусот ковид-19, потпишал изјава дека ќе остане во задолжителна домашна самоизолација во период од 14 дена. При извршена проверка, на 19 март не бил пронајден во неговиот дом во Арачиново“,
соопшти Обвинителството.
*Поврзана вест: Наместо да седи во самоизолација, отишол во полицијата во Кочани