Предлогот на Стопанската комора е и вработените во приватниот сектор да треба да покажат сертификат за примени две дози вакцини, прележан ковид во последните шест месеци или негативен тест најмалку еднаш неделно. Комората предлага тестирањето со брзи антигенски тестови да биде на трошок на работникот кој не сака да се вакцинира, а работодавецот да одлучува дали тестирањето ќе биде со самотестирање во просториите на компанијата или во некоја лабораторија
Стопанската комора на Северна Македонија бара да се воведе задолжителната вакцинација и во приватниот сектор. Само така, сметаат оттаму, ќе се постигнат колективни резултати во борбата со вирусот, но и ќе се овозможи континуитет на деловните процеси.
Како што соопшти денеска потпретседателката на Комората Анета Трајковска, ова барање во вид на иницијатива е веќе доставено до Владата.
„Ја поддржуваме задолжителната вакцинација во јавниот сектор, посебно во здравството, но сметаме дека вакцинацијата треба да биде задолжителна и во приватниот сектор како што прават повеќето европски земји, повикувајќи се на правото на работникот за заштита при работа. Мора заеднички да работиме на подигнување на степенот на имунизација, што е неопходно да се постигне во пократок временски период за да се спречат мутациите на вирусот. Затоа предлагаме мерката да стапи на сила што поитно, но да се даде период за можност невакцинираните лица кои се во работен однос да се вакцинираат“,
рече Трајковска на прес-конференција.
Според неа, вработените треба да бидат вакцинирани против ковид-19, да имаат потврда дека го прележале вирусот или да се тестираат и за тоа, кога ќе доаѓаат на работа, да приложуваат соодветен сертификат. Притоа, работодавецот, мора да води соодветна евиденција.
„Вработените треба да поседуваат и да приложат на увид сертификат/потврда за извршена имунизација против ковид (за примени најмалку две дози вакцина), како и сертификат/потврда за прележан ковид во последните шест месеци, сметајќи од денот на оздравувањето. За вработените кои не се вакцинирани или го немаат прележано вирусот да се предвиди воведување задолжително тестирање најмалку еднаш неделно со брзи антигенски тестови со само-тестирање или во државни или приватни дијагностички центри, како ќе одлучи работодавецот. Доколку работодавецот се одлучи за само-тестирање, тоа да се изведува во работните простории, а работодавецот да го одреди местото и времето на само-тестирање. Работодавачот треба да води евиденција на евидентен лист кој мора да го содржи датумот на тестот, резултатот од тестот (позитивен, негативен) и потпис на работникот“,
објасни Трајковска.
Некои компании, додаде таа, самоиницијативно ги тестираат вработените кои не се вакцинирани.
„Доколку работодавецот се одлучи за правење антигенетски тест во дијагностичките центри, работникот треба да приложи резултат издаден од лабораторијата каде е направен. Трошокот за тестирање со брзи антигенски тестови да биде на товар на работникот. За да нема дилеми во примената, се предлага Одлуката да се дополни и со тоа дека непочитувањето на пропишаната мерка за задолжително тестирање во случај кога вработеното лице не е вакцинирано или нема прележан ковид во последните шест месеци, претставува повреда на прописите за безбедност и заштита при работа, за што работодавецот применува мерки во согласност со прописите што ги регулираат работните односи (Законот за работните односи и колективните договори), по примерот на Словенија“,
рече потпретседателката на Комората.
За да нема зголемување на цените за тестирање во ваква ситуација, Комората предлага Владата да ги замрзне цените, односно да ја ограничи највисоката цена за тестови.
Новите мерки што денеска до Владата ги предложи Комисијата за заразни болести се однесуваат на вработените во јавниот сектор, додека за приватниот сектор тие се само препорака.
Додека компаниите бараат тие мерки да се воведат и за приватниот сектор, од Сојузот на синдикати на Македонија (ССМ) реагираа дека не се согласуваат со рестрикциите и велат дека вакцинацијата мора да биде резултат на лична определба на работниците и не смее да се спроведува со присила.