Генералниот секретар на Алијансата вчера го обвини поранешното раководство на Авганистан за брзиот колапс на нивните вооружени сили, кои беа поддржани од Запад, но призна дека НАТО мора да ги отстрани недостатоците на сопствената програма за воена обука
Генералниот секретар на НАТО, Јенс Столтенберг за петок закажа вонреден состанок на шефовите на дипломатиите на земјите -членки на Алијансата во врска со ситуацијата во Авганистан.
Столтенберг на Твитер напиша дека ќе претседава со состанокот преку видеоврска, која ја свика „со цел да продолжи тесната координација“ на 30-те земји членки на НАТО и „да се разговара за заеднички пристап кон авганистанското прашање“.
Генералниот секретар на Алијансата вчера го обвини поранешното раководство на Авганистан за брзиот колапс на нивните вооружени сили, кои беа поддржани од Запад, но призна дека НАТО мора да ги отстрани недостатоците на сопствената програма за воена обука.
НАТО ги предводеше меѓународните безбедносни напори во Авганистан од 2003 година, но од 2014 година се фокусираше на обука на силите на земјата.
Алијансата помогна во создавањето на авганистанската армија, која броеше околу 300.000 припадници, но таа воопшто не се спротивстави на талибанските екстремисти кои минатата недела ја презедоа контролата врз речиси целата земја.