Украинскиот министер за надворешни работи Андриј Сибиха во меѓувреме соопшти дека имал „конструктивен разговор“ по телефон со американскиот државен секретар Марко Рубио, со кого разговарале за претстојната средба меѓу делегациите на двете земји следната недела во Саудиска Арабија
Американскиот претседател Доналд Трамп денеска изјави дека му е полесно да преговара со Русија отколку со Украина.
„Вашингтон ќе ја прекине помошта за Киев доколку тој не е подготвен да го реши конфликтот преку преговори“,
рече Трамп пред новинарите во Белата куќа.
Запрашан дали рускиот лидер ја користи паузата во доставувањето на американското разузнавање и воената помош за Украина, Трамп одговори:
„Всушност мислам дека тој го прави она што би го направил некој друг. Тој сака да стави крај на војната. И мислам дека тој ќе биде подарежлив отколку што треба“.
Говорејќи пред новинарите во Овалната соба, Трамп рече дека му е „полесно“ да работи со Русија отколку со Украина и дека Путин „сака да стави крај на војната“.
„Искрено, потешко ми е да се справам со Украина“,
рече Трамп.
Трамп го изјави ова во момент кога неговата администрација се обидува да постигне мировен договор меѓу Русија и Украина.
Украинскиот министер за надворешни работи Андриј Сибиха во меѓувреме соопшти дека имал „конструктивен разговор“ по телефон со американскиот државен секретар Марко Рубио, со кого разговарале за претстојната средба меѓу делегациите на двете земји следната недела во Саудиска Арабија.
„Украина сака војната да заврши, а американското раководство е суштински фактор за постигнување траен мир. Разговаравме и за начините за развој на нашата билатерална соработка“,
напиша Сибиха на „Икс“.
I had a constructive call with @SecRubio. We discussed the upcoming meeting between Ukrainian and US delegations in Saudi Arabia. Ukraine wants the war to end, and US leadership is essential for achieving lasting peace. We also discussed ways to advance our bilateral cooperation.
— Andrii Sybiha 🇺🇦 (@andrii_sybiha) March 7, 2025
Претходно Трамп се закани со нови санкции и царини за Русија како одговор на последниот руски напад. Во објава на неговата платформа „Трут сошал“, Трамп рече дека со оглед на тоа што Русија буквално ја „меле“ Украина на бојното поле размислува за големи банкарски санкции и царини за Русија додека не се постигне прекин на огнот и не се постигне конечен мировен договор.