Се воодушевив на политичката сила која доведе до договор со Грција и затоа остатокот од задачата треба, исто така, да ни успее, рече германскиот канцелар на крајот на неколкучасовната посета на Скопје
Сите предуслови за Северна Македонија се исполнети и, од моја гледна точка, првата меѓувладина конференција со ЕУ може да се одржи, кажа германскиот канцелар, Олаф Шолц на денешната прес-конференција со премиерот Димитар Ковачевски во Скопје.
Шолц порача дека Западен Балкан е од стратешко значење за Германија и дека тој лично ќе се залага за негов прием во Европската Унија, особено за Северна Македонија.
„Од пред дваесет години на Западен Балкан му беше ветена европска перспектива и време е по ова ветување да следат дела. Би сакал многу јасно да кажам дека Германија е многу сериозна со ЕУ-интеграцијата за државите од регионот и ова важи особено за Северна Македонија. Европската Унија кон Северна Македонија има дадено ветување, а таа ги исполните сите предуслови. Се воодушевив на политичката сила која доведе до договор со Грција и затоа остатокот од задачата треба, исто така, да ни успее“,
кажа Шолц.
Toj порача и дека реформите во земјава треба да продолжат.
„Ја охрабрувам Северна Македонија да продолжи ангажирано по патот на реформите. Колку побрзо напредувате, толку побрзо ќе може да напредуваат и пристапните преговори кога веќе ќе бидат започнати“,
рече Шолц.
Премиерот Димитар Ковачевски кажа дека поддршката од Германија е големо охрабрување за нашите ЕУ-аспирации. Тој посочи дека е особено важно што посетата се случува во пресрет на јунскиот Самит на шефовите на држави и влади на Европската Унија и дека го очекува заслужениот чекор кој ќе го деблокира процесот за почеток на преговори за Северна Македонија.
„Вашето присуство тука, почитуван канцелар Шолц, е јасна порака дека Германија придава големо значење на регионот на Западен Балкан и дека сега е време Северна Македонија да ги започне преговорите за членство“,
рече Ковачевски.
Тој посочи дека четириесет и пет проценти од нашето законодавство е усогласено со европското, но дека Северна Македонија и Албанија се заложници на патот кон ЕУ.
„Македонските граѓани својата независност ја слават на Денот на независноста – 8 Септември. Ние не можеме да бидеме постојано заложници на самитите на Европската Унија, дали ќе има датум или нема да има датум. Подгревање на очекувања, како што беше во минатото, за тоа што ќе се случи на некој самит, не зависи од Република Северна Македонија. Тоа исклучиво зависи дали 27-те земји членки ќе се усогласат и ќе донесат одлука за отпочнување на првата меѓувладина конференција. Тоа, во моментов, зависи, според се како што гледаме, од само една земја членка на ЕУ, која држи две кандидатски земји-членки, Северна Македонија и Албанија, како заложници на патот за интеграција во ЕУ“,
рече Ковачевски.
Шолц го поздрави фактот што Северна Македонија се придружила на санкциите кон Русија. Тој кажа и дека од 2014 до 2021 трговска размена меѓу Северна Македонија и Германија е повеќе од дуплирана, од 2,2 на 4,7 милијарди евра.
Германскиот канцелар утрово беше пречекан на платото пред Владата со највисоки државни и воени почести.
Доаѓање во земјава е дел од неговата дводневна балканска турнеја. Тој вчера беше во Косово и Србија, а од Скопје денеска ќе замине во Софија.
Претходно, германската амбасадорка Анке Холштајн во интервју за „360 степени“, најавувајќи ја посетата на Шолц на Северна Македонија и на Бугарија, кaжа дека тоа е дел од ангажманот на Берлин за деблокада на пристапниот процес за земјава.
Но, во последната анализа на „Франкфуртер алгемајне цајтунг“ во пресрет на посетата на канцеларот, се вели дека мали се шансите посетата на Шолц да помрдне нешто во бугарско-македонскиот спор и да му го отвори патот на Скопје кон ЕУ.