ЗНМ на редовното неизборно собрание викендов побара од власта да се санкционираат сите напади против новинарите
Новинарите најавуваат протестен марш ако не се сменат двојните аршини на казнување за напади врз политичари, но не и врз новинари
Здружението на новинари на Македонија бара да се санкционираат нападите врз новинарите и медиумските работници и сторителите да одговараат.
На редовното неизборно собрание што се одржа викендот претседателот на ЗНМ, Младен Чадиковски, ја презентира Декларацијата за престанок на неказнивоста на нападите и заканите кон новинарите и медиумските работници, во која се повикуваат институциите, политичките партии и деловните субјекти да ја почитуваат слободата на изразување на новинарите и медиумските слободи, согласно уставните, правните и меѓународните правни норми и стандарди.
„Во случаите кога се напаѓани новинари, нема речиси ниту еден решен случај, а државата потфрли и во случајот со 27 април. Десетици колеги беа брутално атакувани, а институциите не само што не поведоа ниту една постапка туку се дрзнаа преку државното правобранителство да се обидат да ја одбијат тужбата на нашите колеги“,
рече Чадиковски.
Доколку продолжат двојните аршини, односно да се реагира секогаш кога се нападнати политичари, но не и кога се нападнати новинари, Чадиковски во името на Здружението најави протестен марш.
Следна новина ќе биде кодексот за онлајн-медиуми
Како една од важните активности реализирани во 2019 година, Чадиковски го издвои креирањето на Регистарот на професионални онлајн-медиуми (Promedia.mk) и најави дека следно ќе биде новинарско кодекс за овој тип медиуми.
„Ова е процес што мора да продолжи. Следно на што работиме е создавање на новинарски кодекс за онлајн-медиуми, кој ќе биде паралелен процес на обновата на актуелниот Кодекс на новинарите на Македонија“,
рече Чадиковски.
На собранието беше презентирана и Стратегијата за работа на ЗНМ за периодот 2019-2022 и Наративниот извештај и Финансискиот извештај за работата за 2019 година.
Во Статутот на ЗНМ беа усвоени неколку решенија кои го регулираат статусот на придружните членови и условите под кои тие може да се зачленат. На барање на комисијата за членство беше продолжен рокот по кој таа може да одлучува за примање на нови членови во Здружението, односно наместо три, сега рокот ќе биде седум дена за да се овозможи подетален преглед на комисијата на секој новопријавен член.
Усвоена е и одлука која ќе се допрецизира во наредниот период, која предвидува исклучување на членови од Здружението поради флагрантно кршење на етичкиот кодекс.