Во однос на иницијативите за собирање донации на платформи на социјалните мрежи, Саити рече дека ја почитува желбата на граѓаните да помогнат, но дека е против објавување лични податоци на настраданите
Досега се собрани над 54 милиони денари за настраданите во пожарот во Кочани, информира денеска Саит Сати, генерален секретар на републичкиот Црвен крст на прес-конференција на која ги претстави сите преземени активности за поддршка на настраданите од пожарот во дискотеката во која починаа 59 лица, а повеќе од 150 се повредени.
Откако ќе ги соберат сите потребни изјави за користење на лични податоци на повредените и нивните семејства, како што најави, веднаш ќе пристапат кон исплата на паричната помош. Токму тоа, според него, е причината зошто досега не се исплатени средства. Додаде дека собирањето на личните податоци и согласност за нивно користење е предизвик што го забавува процесот на исплата на помошта.
„Согласно законските прописи, почитувајќи го Законот за заштита на личните податоци, Црвениот крст е потребно да обезбеди согласност за обработка на личните податоци. Викендов успеавме да ги обезбедиме податоците, денеска се пристигнати кај нас. Се договоривме податоците за лицата што се лекуваат во странство да ги соберат службите на Владата. Дел од нив се добиени, а остатокот ќе пристигнат до крајот на денот. Се надевам дека со натчовечки напори тоа ќе успееме да го завршиме тоа за ден-два и веднаш ќе пристапиме кон исплата на средствата. Денеска раководниот одбор донесе одлука за секој настрадан да се исплати сума од 150 илјади денари како првична финансиска и најитна помош“,
рече Саити.
Според него, оваа процедура мора да биде законски проследена, оти непочитување на Законот за лични податоци е казниво.
„Глобата е четири отсто од вкупниот поход на организацијата доколку не се придржувате до Законот за обработка на личните податоци. Тогаш замислете колкави би биле последиците по Црвениот крст и лицето законско за застапување. Досега праксата беше дека средствата се делеа по затворање на кампањите. Овој пат направивме исклучок и ќе одиме во фази. Но, потребно ни е време, оти не се малку семејства, а процесот на собирање на податоците е сложен, бидејќи изјавата треба да биде лична и треба да биде потпишана своерачно. Тоа е закон и мора да го почитуваме“,
кажа генералниот секретар на Црвениот крст.
Во однос на иницијативите за собирање донации на платформи на социјалните мрежи, Саити рече дека ја почитува желбата на граѓаните да помогнат, но дека е против објавување на лични податоци на настраданите.
„Не би било добро Црвениот крст да биде тој што ќе ги означи или критикува оние што сакаат да направат платформа и да помогнат за да не бидеме сфатени дека само ние сакаме да бидеме единствени. Гледаме дека има различни амбиции има една иницијатива во Кочани, но би кажал дека не би се осмелиле како Црвен крст да користиме личен податок на некој и да го објавиме на таков начин со цел да спречиме во иднина можна злоупотреба на тие податоци“,
вели тој.
Додаде дека и по цена да бидат критикувани, Црвениот крст ќе се придржува до законските прописи.
Според него, во наредниот период Црвениот крст ќе биде посветен на теренските активности, особено во делот на давање психолошка поддршка за која посочи дека наредниот период ќе биде најпотребна.