Согласност, како што појасни Сиљановска-Давкова, очекува уште од еден, како што рече, почитуван пензиониран новинар и од уште една професорка по казнено право од Штулов универзитет
Новата Комисија за помилување ќе биде конституирана за два-три дена, најави вечерва во интервју за МРТ 1 претседателката Гордана Сиљановска-Давкова. Таа откри дека досега, да бидат членови на Комисијата, прифатиле пензионираната судијка од Врховниот суд Милка Ристова, професорите Оливер Бачановиќ, Афет Мамути, Александра Груевска и психолог професор од Факултетот за безбедност Драгана Батиќ.
Согласност, како што појасни Сиљановска-Давкова, очекува уште од еден, како што рече, почитуван пензиониран новинар и од уште една професорка по казнено право од Штулов универзитет.
„Најважното за оваа комисија е прво, бидејќи доаѓа Нова година, а тогаш има помилувања, да го стори тоа. Ама, час поскоро да ги свика членовите на сите претходни комисии за помилувања, за да ги чуе нивните забелешки, искуства и предлози. Потоа, исто така, да свика, претседателката на Комисијата една расправа, знаете дека беше изработена работна верзија на Закон за помилување. Нашиот Закон за помилување сега е многу дефектен, после промените, значи укинувањето на одредби од Уставниот суд, навистина, нам ни треба еден закон компатибилен со европските и мислам дека тогаш Комисијата ќе може да го преземе товарот на одлучувањето“,
изјави претседателката.
Нам ни треба закон, нагласи Сиљановска Давкова, во кој точно ќе се утврди кој, како и што прави, но најголемата опасност за овој процес е да се политизира или партизира.
„Помилувањето кое кај нас е минимално, мора да се однесува на социјализацијата и ресоцијализацијата, врзана за делата кои што се сторени. Ќе се најдеме набрзо под силно обвинение за тортура над затворениците. Држава сме со најмалку помилувања, држава сме со најмало време на помилувања. Сега зборувам за шест, три или еден месец. Нам ни препорачуваат да се зголеми должината на помилувањата, затворските услови и да видиме дали не треба и во поглед на делото производство и дистрибуција на наркотици, како и можност за помилување ако се на доживотен затвор, што во светот е нормална работа“,
изјави Сиљановска Давкова.