Со приложена лекарска потврда, децата со посебни потреби или со пречки во развојот можат да бидат ослободени од обврската за задолжително носење маска во училиштата, заклучи Владата на вчерашната седница
Протоколот за реализација на воспитно-образовниот процес ќе претрпи измени и дополнувања во врска со задолжителното носење на заштитни маски за децата.
Владата на вчерашната седница донесе заклучок дека децата со посебни потреби или со пречки во развојот, можат да бидат ослободени од обврската за задолжително носење маска во училиштата доколку приложат лекарска потврда за нивната состојба.
На истата седница се донесени измени и за протоколот за одржување на културни настани на затворено, односно ќе може да присуствуваат само лица кои примиле две дози од вакцината против ковид.
Во затворено само со примени две дози
На седницата е донесен и заклучок дека на настани како театри, кина, филхармонија и други се зголемува и присуството на публика до 50 отсто од капацитетот на салата, наместо досегашните 30 отсто.
„Во врска со овој протокол, се воведува и условот посетителите да бидат вакцинирани со две дози со вакцина против ковид-19, a останува обврската на организаторот да ги спроведува и контролира сите останати препорачани превентивни мерки за спречување на ширење на вирусот и да организира редарска служба за контрола на мерките“,
велат од владината прес-служба.
На оваа седница е прифатена препораката на Комисијата за заразни болести да се прифати барањето на Агенцијата за млади и спорт да се дозволи организирање и учество на натпревари во сите спортски во категориите пионери, младинци и кадети без приложен сертификат за вакцинација, со заклучок дека останува препораката да се вакцинираат сите за кои е одобрена вакцинацијата, вклучувајќи ги и децата и младинците од 12-годишна возраст.