„Тие луѓе не разбираат дека немаат сила на север, никој не се плашеше од Албанците. Тие не можат ништо да направат на север. Тие не се посилни од Србите“, рече Вучиќ
Претседателот на Србија, Александар Вучиќ вечерва во интервју за ТВ Прва изјави дека Приштина сè уште провоцира, односно дека испраќа екипи на косовската полиција кои преминуваат од јужниот во северниот дел на Митровица, а потоа се враќаат.
Тој вели дека специјалната косовска полиција (Росу) поставила два контролни пункта кај Грабовац и Газиводa и дека повремено „застануваат да земат некого, само да провоцираат“.
„Тие луѓе не разбираат дека немаат сила на север, никој не се плашеше од Албанците. Тие не можат ништо да направат на север. Тие не се посилни од Србите“,
рече Вучиќ.
Коментирајќи ја оценката на специјалниот претставник на ЕУ за дијалог меѓу Белград и Приштина, Мирослав Лајчак, дека би можеле да поминат децении за да се реши косовското прашање доколку не се реши до 2024 година, Вучиќ рече дека е за компромис и договор, но дека не може да направи компромис со тепање на Србите.
Коментирајќи го зголемувањето на борбената готовност во Србија, Вучиќ изјави дека на тој повик се јавиле „десетици илјади луѓе“, односно 89 отсто од војниците. Додаде дека Србите никогаш не биле помотивирани и дека 98 отсто од Србите од северот на Косово ги поддржуваат барикадите.
По 19 дена блокирање на патиштата, на 29 декември, групи Срби од северот на Косово ги отстранија барикадите што беа поставени по апсењето на еден од поранешните полицајци на косовските Срби, Дејан Пантиќ.
Во меѓувреме, косовскиот премиер Албин Курти изјави дека немал некакви тајни преговори со српските власти во врска со одблокирањето на косовско-српските гранични премини и додаде дека на Србија не ѝ дал никакви гаранции за формирање Заедница нa српски општини (ЗСО).