За безбедносната состојба на Косово и активностите на КФОР во врска со ова прашање со Манч денеска разговараше и српскиот министер за надворешни работи, Ивица Дачиќ. Како што се наведува во соопштението на Министерството, на средбата биле разменети мислења „за моменталната состојба и перспективата на партнерската соработка меѓу Србија и НАТО“, како и за регионални, европски и глобални безбедносни прашања
Претседателот на Србија, Александар Вучиќ, соопшти дека на денешната средба во Белград на командантот на Здружената команда на НАТО, адмирал Стјуарт Манч му ја пренел молбата Алијансата да ги заштити Србите на Косово.
„Побарав од НАТО да го заштити нашиот народ на Косово и Метохија и се заблагодарив за разбирањето на српската политика на неутралност“,
објави Вучиќ на Инстаграм со фотографија од средбата со Манч.
За безбедносната состојба на Косово и активностите на КФОР во врска со ова прашање со Манч денеска разговараше и српскиот министер за надворешни работи, Ивица Дачиќ.
Како што се наведува во соопштението на Министерството, на средбата биле разменети мислења „за моменталната состојба и перспективата на партнерската соработка меѓу Србија и НАТО“, како и за регионални, европски и глобални безбедносни прашања, пренесува регионалниот сервис на Радио Слободна Европа.
Посебно била нагласена важноста на ангажманот на КФОР „во строго, целосно и непристрасно спроведување на мандатот што беше воспоставен и доделен на КФОР врз основа на Резолуцијата 1244 на Советот за безбедност на ОН“.
Дека Белград не сака ескалација на конфликтот на Косово и дека се залага за мирно решавање на сите прашања преку дијалог, соопшти српското Министерство за одбрана, на Манч му пренел и српскиот министер за одбрана, Милош Вучевиќ.
На средбата со Манч, Вучевиќ изјавил и дека Србија е „целосно посветена на воената неутралност“, но, и „за постигнување добри односи со клучните актери на меѓународната политика за да се изградат најдобри можни партнерски односи“.
Во интервју за агенцијата Бета пред денешните состаноци во Белград, Манч рече дека мисијата КФОР е „целосно способна и подготвена да обезбеди безбедна средина и слобода на движење за сите заедници на Косово“.
„Од октомври, го зајакнуваме нашето присуство, меѓу другото, со додавање сили, како и патроли на северот на Косово оваа недела“,
рече Манч.
Тој истакна дека НАТО ќе продолжи да развива партнерство со Србија, додавајќи дека подобрувањето на односите е можно и без Србија да влезе во алијансата.
„Можеме да имаме силни односи со нашите партнери, како што имаме со Австрија и Швајцарија, без тие да станат членки. Целосно ја почитуваме нивната одлука да не влезат во НАТО, исто како што ги почитуваме одлуките на другите да се приклучат“,
рече тој.
Манч додаде дека политичките и воените консултации меѓу Србија и НАТО постојат на различни нивоа, вклучително иво рамките на штабот на НАТО во Брисел, командата на сојузничките операции/врховната команда на сојузниците за Европа во Монс и командата на здружените сили на НАТО во Неапол, како и преку директна комуникација меѓу началникот на Генералштабот на српските вооружени сили и мировната мисија на НАТО на Косово (КФОР).
Според него, практичната соработка меѓу Србија и НАТО се одвива во области кои најмногу придонесуваат за безбедносните интереси и потреби на Србија.
„На пример, работевме заедно за да бидеме поподготвени за итни случаи како што се поплави и шумски пожари. И помагаме на Србија да ги реформира своите безбедносни сили и институции. НАТО обучува српски војници за мировни мисии и инвестиравме милиони евра за да ѝ помогнеме на Србија да уништи стотици тони застарена муниција“,
рече Манч.
Наведувајќи дека Русија го прави „точно спротивното“ на Западен Балкан, Манч рече дека НАТО ја повикува Москва да одигра конструктивна улога во овој дел од Европа.
„На мое ниво, на ниво на координација на воените односи меѓу НАТО и Србија, мислам дека војната во Украина нема никакви негативни последици врз нашата способност за комуникација и соработка. Нема да коментирам за политичките одлуки на Србија, но ќе речам дека ја поздравуваме поддршката на Србија за две резолуции на Генералното собрание на ОН со кои се осудува руската агресија врз Украина“,
рече Манч.
Тој истакна дека претставниците на НАТО „редовно ги имаат на увид хакерските активности, дезинформациите, заплашувањата и други дестабилизирачки активности“ на Русија на Западен Балкан.
„Минатата година Русија и Кина работеа заедно во ОН за да ги поткопаат целите на меѓународната заедница за проширување на мисијата на Европската унија Алтеа (во Босна и Херцеговина)“,
додаде претставникот на НАТО.