Претходно вчера косовскиот премиер се сретнал со специјалниот пратеник на ЕУ за дијалог меѓу Србија и Косово, Мирослав Лајчак, а на состанокот, меѓу другото, се разговарало и за одлуката на Косово да ја забрани употребата на динари во готовинските плаќања
Српскиот претседател Александар Вучиќ синоќа одржал итен состанок со дел од министрите во владата откако косовскиот премиер Албин Курти го одбил предлогот на Европската Унија, САД и земјите од Квинт и одлучил од утре (1 февруари) да стапи во сила одлуката за употреба на еврото како единствена валута во Косово.
На средбата одржана во претседателскиот кабинет се разговарало за следните чекори што Белград ќе ги преземе во врска со ова прашање, јави српскиот радиодифузен сервис (РТС).
Претходно вчера косовскиот премиер се сретнал со специјалниот пратеник на ЕУ за дијалог меѓу Србија и Косово, Мирослав Лајчак. На состанокот во Приштина, меѓу другото, се разговарало и за одлуката на Косово да ја забрани употребата на динари во готовинските плаќања. На прашањето дали разговарал со Курти за одложување на ваквата одлука на Централната банка на Косово, Лајчак одговори:
„Го споменавме ова прашање од одлуката на Централната банка на Косово, но не сакам да настапувам како портпарол на косовската влада. Ќе бидете информирани утре за тоа.“
Централната банка на Косово (ЦБК) донесе уредба според која од 1 февруари единствена валута за готовински платежни трансакции ќе биде еврото. Во указот на Банката се наведува дека ваквата уредба е донесена согласно Уставот на Косово и законот на Централната банка на Косово и дека ЦБК е единствената монетарна власт која може да одлучува за дозволените апоени на валутата евро за оптек на територијата на Косово.