Централната банка на Косово (ЦБК) донесе уредба според која од 1 февруари единствена валута за готовински платежни трансакции ќе биде еврото
Европската Унија повикува на воведување доволно долг преоден рок за примена на одлуката на Централната банка во Приштина за забрана на користењето други валути во Косово, освен еврото, со цел да се најде решение за ова прашање по пат на преговори, изјави денеска портпаролот на ЕК за надворешни работи и безбедносна политика Петер Стано.
Одговарајќи на новинарско прашање на денешниот брифинг во однос на писмото на амбасадорите на Квинт упатено до косовскиот премиер Албин Курти со кое се бара одлагање на примената на оваа одлука, која треба да стапи во сила на 1 февруари, Стано истакна дека ЕУ е свесна за последиците што таа ќе ги има врз припадниците на српската заедница во Косово.
„Оваа одлука ќе има влијание врз секојдневниот живот на огромното мнозинство косовски Срби кои примаат плати или финансиска помош од Србија во српски динари. Затоа, имајќи ги предвид потенцијалните последици од оваа одлука врз процесот на нормализација на односите меѓу Косово и Србија, очекуваме дека оние аспекти кои се однесуваат на српската заедница ќе бидат опфатени со дијалогот што се води со посредство на ЕУ“,
изјави Стано.
Во врска со целта на денешната посета на специјалниот претставник на ЕУ за дијалогот Белград-Приштина Мирослав Лајчак на Србија и на утрешната на Косово, Стано истакна дека неговиот мандат е да ги забрза разговорите меѓу двете страни, па затоа тој е во интеракција со партнерите во регионот, со членките на ЕУ и со меѓународната заедница.
„Неговите денешните разговори со српскиот претседател Александар Вучиќ во Белград и утрешните со косовските партнери во Приштина, се дел од неговиот мандат и неговата работа да го поттикне дијалогот“,
рече Стано.
Централната банка на Косово (ЦБК) донесе уредба според која од 1 февруари единствена валута за готовински платежни трансакции ќе биде еврото.
Во указот на Банката се наведува дека ваквата уредба е донесена согласно Уставот на Косово и законот на Централната банка на Косово и дека ЦБК е единствената монетарна власт која може да одлучува за дозволените апоени на валутата евро за оптек на територијата на Косово.
Сепак, Централната банка на Косово наведува дека другите валути може да се користат само како вредност за чување во физичка форма или на банкарски сметки, за меѓународни плаќања или девизни активности.