Српскиот претседател Александар Вучиќ на средбата со словенечкиот претседател Борут Пахор побарал финансиска помош од ЕУ за надминување на енергетската криза во Србија и земјите од Западен Балкан. Како што пренесе РТС, Вучиќ на состанокот се осврнал на прашањето како секоја земја се подготвува за претстојната зима од аспект на енергетската криза и како може меѓусебно државите да помогнат.
„Го замолив Пахор доколку биде во можност да се заложи пред институциите на ЕУ за финансиска помош за увезената струја или пак за дел од веќе потрошената струја. Сигурен сум дека можеме да сметаме на поддршка на словенечкиот пријател. Секако дека не очекуваме помош висока како да сме членки на Унијата, но се што можеме да добиеме би било значајно и за Србија но и за другите земји од регионот“
порача Вучиќ.
Прашањето за енергетската криза беше и меѓу главните теми на средбата на политичките лидери самитот што се одржа во рамки на иницијативата Отворен Балкан во која се Северна Македонија, Србија и Албанија.
По Самитот политичките лидери на овие земји најавија дека ќе побараат помош од ЕУ, чија членка е и Бугарија.
Патувањето на Ковачевски со владина делегација во Софија, ќе следува еден ден по завршувањето на Саемот за вино, храна и туризам во рамки на Отворен Балкан, кој се одржува во Белград.
Албанскиот премиер Еди Рама изјави дека Скопје, Тирана и Белград ќе побараат и дополнителна финансиска поддршка од ЕУ и порача Унијата да не го повтори срамното однесување кон Западен Балкан во однос на енергетската криза, како што беше случај за време на пандемијата на коронавирусот, кога земјите од регионот беа принудени да се обратат до Русија, Кина и Турција за помош со вакцините.
Зборувајќи за справувањето со енергетската криза на истата прес-конференцијата, премиерот Ковачевски ја спомена Бугарија велејќи дека тоа е држава која граничи две земји (Србија и Северна Македонија) кои се дел од Отворен Балкан и мора да се работи на обезбедување непречено функционирање на меѓународните интерконекции во текот на целата зима, на барање на стопанските субјекти кај нас.