Знаејќи дека никогаш нема да бидат задоволни со ниту една одлука до конечното ослободување (на уапсените Срби на Косово н.з.), одам пред нив убеден дека го зачувавме мирот и добивме гаранции за безбедноста и опстанокот на Србите, објави Вучиќ на својот Инстаграм профил
Претседателот на Србија, Александар Вучиќ, вечерва соопшти дека е на пат за Рашка, на југот на Србија, каде ќе разговара со претставници на Србите од Косово.
„Знаејќи дека никогаш нема да бидат задоволни со ниту една одлука до конечното ослободување (на уапсените Срби на Косово н.з.), одам пред нив убеден дека го зачувавме мирот и добивме гаранции за безбедноста и опстанокот на Србите“,
објави Вучиќ на својот Инстаграм профил.
Претходно, шефот на Канцеларијата за Косово во Владата на Србија, Петар Петковиќ на прес-конференција изјави дека претседателот на Србија побарал од Србите на северот на Косово да се повлечат од барикадите кои во последните 18 дена ја блокираат патната инфраструктура.
Петковиќ рече дека барање е испратено по заедничката изјава на Соединетите Американски Држави (САД) и Европската унија (ЕУ) во која се изразува загриженост за настаните на Косово и одговорот на барањата на претставниците на Србите.
Како добра вест и голема победа тој ја оцени одлуката на косовоскиот суд за промена на безбедносните мерки за поранешниот полицаец ,Дејан Пантиќ од притвор во домашен притвор.
Апсењето на Пантиќ беше повод за поставување барикади од страна на локалните Срби во општините во северно Косово со мнозинско српско население и за блокада на патиштата кои водат кон граничните премини „Јариње“ и „Брњак“ меѓу Косово и Србија.
Српска листа, главната партија на Србите на Косово, постави неколку услови за отстранување на барикадите, што беа поставени по апсењето на Пантиќ, а еден од нив е ослободување на уапсените Срби.
Американскиот амбасадор во Србија, Кристофер Хил денеска за порталот „Нова.рс“ изјави дека ги разбираат фрустрациите на Србите, но дека е време да се отстранат барикадите.
„Ме прашавте што мислам за барикадите, реков дека разбирам зошто се таму, но мислам дека сега е моментот тие што ги поставија да ги отстранат“,
изјави Хил.
Тој посочи дека политичко решение може да се најде преку процесот на дијалог и дека тоа е во фокусот на меѓународните посредници.
„Мораме да дојдеме до точка да ја смириме ситуацијата и да се справиме со политичките прашања што треба да се решат. Ова е нешто што сите се обидуваат да го направат и се надевам дека ќе бидеме успешни во тоа“,
додаде амбасадорот.
Зборувајќи за Заедницата на општини со српско мнозинство, Хил рече дека тоа е обврска на Приштина и дека не е прашање дали ќе се формира или не, туку како ќе функционира и на кој начин ќе се спроведува.