На новинарско прашање кои се имињата што ќе бидат предложени за наследник на Вучевиќ, Вучиќ рече дека тој како претседател ќе именува премиер, но дека има ограничувања. Како што дополни, за некој да биде предложен за мандатар, треба претходно собраниското мнозинство да го определи, или некој да го увери претседателот дека кандидатот има парламентарно мнозинство зад себе
Српскиот претседател Александар Вучиќ, во вечерашното обраќање до јавноста изјави дека по оставката на премиерот Милош Вучевиќ ќе ги покани сите на консултации за формирање нова влада, а друга опција, како што рече, е одржување на нови избори.
Вучиќ рече дека нема да има преодна влада и дека одлуките што ќе ги носат ќе бидат додека е таа во технички мандат.
„Нема да има преодни влади, или ќе има нова или ќе одиме на избори“,
рече Вучиќ.
Обраќањето на Вучиќ доаѓа откако денеска српскиот премиер Милош Вучевиќ поднесе оставка поради синоќешните напади на студенти за време на протестите во Нови Сад.
Според Вучиќ, избори може да има за 75 дена, а најреално во април.
„Постапката е следна, почнува со констатирање на оставката во Собрание. Кога ќе биде констатирана, почнува рокот од 30 дена додека мора да се избере влада, ако не се избере, се распишуваат избори. Претседателот на Републиката е должен да покрене постапка за избор на нова влада, нема да избегнувам консултации, иако знам дека ќе добивам само навреди. Да разговараме дали да одиме на формирање влада или на нови избори. Вучевиќ веќе почнал разговори со Дачиќ, рекол дека не е за избори. Ќе продолжиме со разговорите со другите“,
рече Вучиќ.
На новинарско прашање кои се имињата што ќе бидат предложени за наследник на Вучевиќ, Вучиќ рече дека тој како претседател ќе именува премиер, но дека има ограничувања. Како што дополни, за некој да биде предложен за мандатар, треба претходно собраниското мнозинство да го определи, или некој да го увери претседателот дека кандидатот има парламентарно мнозинство зад себе.
„Имав три или четири имиња во главата, но јас не сум сигурен дека нема да одиме на избори. За само десет дена, кога ќе ви кажам дали ќе одржиме избори или ќе избереме нова влада, ќе бидам подготвен да зборувам за кандидатите за премиер“,
рече Вучиќ.
Говорејќи за синоќешните инциденти во Нови Сад, Вучиќ рече дека момчињата што тоа го сториле им нанеле штета на државата и на Српската напредна странка (СНС).
Вучиќ истакна оти синоќа ги исполниле сите барања што ги поставиле студентите.
„Решивме и некои прашања кои ги нарушуваат моите принципи, а се однесуваат на помилувања. Ноќта кај Автокоманда помина мирно, без инциденти. Задоволни сме од постигнатото, иако не сме наивни дека некој со ентузијазам ќе скокне и ќе каже дека барањата се исполнети“,
рече претседателот на Србија.
Во врска со нападот на студент во Нови Сад, Вучиќ нагласи дека сака, како што рече, да каже што навистина се случило.
„Веќе неколку дена се цртаат графити во просториите на СНС. Тие мислат дека имаат право да ги загрозат просториите и луѓето во тие простории. Така, претходната вечер, помеѓу три и четири часот наутро, речиси секогаш истите луѓе од анархистичката група во Нови Сад почнаа да прават графити, да поставуваат шаблони на партиските простории. Момците од партиските простории излегле надвор, ги тргнале од таму и тоа било во ред. Но, потоа се случило нешто скандалозно што не го разбираме. Момците кои го направија ова предизвикаа огромна штета на земјата, државата и секој од нас“,
рече Вучиќ.
Тој истакна дека инцидентот дошол како гром од ведро небо.
Според него, одговорност мора да има и дека никој не е над законот.
„Никој не е над законот, можете да бидете поддржувач на СНС, ќе одговарате за кривично дело. Политичка одговорност мора да постои, политичарите да покажат дека се објективни. Ќе инсистираме на дијалог, на разговор со сите“,
додаде тој.
Вучиќ најави и дека во текот на утрешниот ден ќе потпише помилување за 13 лица што биле уапсени на претходните протести.
„Има процедура, ќе ја потпишам утре попладне“,
рече тој.
По синоќешниот напад на сатуденти во Нови Сад, вечерва во повеќе градови во Србија се одржаа протести.
Овој инцидент беше причина денеска освен премиерот Вучевиќ, оставка да си поднесе и градоначалникот на Нови Сад, Милан Ѓуриќ.