Вчера Ковачевски имаше тет-а-тет средба, а потоа и аудиенција кај папата Франциск, на која присуствуваа и членови на македонската делегација
Премиерот Ковачевски на маргините на неговата работна посета на Ватикан и Рим по повод 24 мај – Денот на сесловенските просветители Светите Кирил и Методиј, оствари средба со неговиот бугарски колега Кирил Петков
Делегацијата што ја предводи премиерот Димитар Ковачевски денеска во рамките на вториот ден од посетата на Рим и Ватикан по повод чествувањето на светите Кирил и Методиј, ќе одаде почит пред гробот на Свети Кирил во базиликата „Сан Клементе“, каде митрополитите Пимен и Јосиф ќе одржат молебен во чест на Св. Кирил.
По посетата на базиликата „Сан Клементе“, премиерот Ковачевски ќе има средба со претседателот на Советот на министри на Италија, Марио Драги.
Во однос на културно-уметничкиот дел од програмата, вечер во киното „Тицијано“ ќе биде прикажан документарниот филм „Медена земја“ во режија на Тамара Котевска, чие претставување е на иницијатива од Македонската амбасада во Рим и Асоцијацијата „Жени дипломати“ при МНР на Италија (АЦДМАЕ).
Вчера Ковачевски имаше тет-а-тет средба, а потоа и аудиенција кај папата Франциск, на која присуствуваа и членови на македонската делегација.
На аудиенцијата кај папата Франциск, како една од централните активности од програмата за чествување на животот и големото дело на Светите Кирил и Методиј, премиерот Ковачевски изрази благодарност за посетата на папата на нашата земја во 2019 година, што беше прва посета на предводник на Римокатоличката црква запишана како историска.
Програмата во чест на 24 Мај – Денот на сесловенските просветители Светите Кирил и Методиј, во текот на вчерашниот ден делегацијата на Северна Македонија ја заокружи со полагање венец на спомен-плочата на македонски јазик во папската базилика „Санта Марија Маџоре“, а потоа и со концертот на реномираниот тенор Благој Нацоски во салата „Балдини“ во Рим.
Премиерот Ковачевски на маргините на неговата работна посета на Ватикан и Рим по повод 24 мај – Денот на сесловенските просветители Светите Кирил и Методиј, вчера оствари средба со неговиот бугарски колега Кирил Петков.
„Во овој момент не можам да кажам за тоа дали има напредок во однос на постигнување на заемно прифатлив документ со Бугарија, но разговорите продолжуваат меѓу експертските тимови на министерствата за надворешни работи и штом ќе има одреден напредок тогаш ќе биде соопштен на ниво на министри“,
изјави Ковачевски по средбата.
Најважно за двете Влади е да имаат конструктивен дијалог и тој да продолжи, изјави Петков за медиумите, пренесе бугарската телевизија Нова.
Петков повика на „да не се подлегнува на провокациите од различни групи кои се обидуваат да ги ескалираат тензиите“ и рече дека Бугарија и Северна Македонија можат да го продолжат правецот на добрососедство само „преку конструктивен дијалог“.
Петков рече и дека двете земји не поставиле рокови, туку меѓусебно си ветиле дека ќе продолжат со „добриот тон“ и уште еднаш го повика претседателот Румен Радев да го свика Советот за национална безбедност и таму да се разговара во однос на спорот со Северна Македонија.