„Претходно истата игра ја одиграа и за архитектот на маките на Албанците, поранешниот директор на УБК, Сашо Мијалков. ДУИ, партија која две децении го манипулира народот со ветувања за реформи и европски интеграции, е убиецот на секоја надеж за правда и подобра иднина“, се вели во реакцијата на коалицијата „Вреди“
За партиите на Албанците обединети во коалицијата „Вреди“, која е дел од владејачкото мнозинство, главен виновник што Никола Груевски нема да ја одлежи двегодишната затворска казна во предметот „Тенк“ е Демократската унија за интеграција (ДУИ).
Според коалицијата, ДУИ со директна интервенција во измените на Кривичниот законик (КЗ) во септември лани овозможила на поранешниот премиер и, како што велат, омилен политичар на Али Ахмети, да му застари уште една затворска казна.
„Ова е уште една шајка на Ахмети во ковчегот на неправдата која неговиот режим ја инсталираше 22 години. После срамната спогодба на ‘абазиското обвинителство’ со Иџет Мемети, ова криминализирано раководство издејствува уште една амнестија. Ова фијаско на фаулираниот правен систем е уште една потврда за вирусот на Ахмети инсталиран во правосудството со години, каде што нивните моќници изградија заштитен ѕид околу себе, спасувајќи се меѓусебно од правосудна одговорност“,
се вели во реакцијата на „Вреди“.
Оттаму велат дека ова не е првпат ДУИ, предводена од Али Ахмети, да интервенира за да си спаси своите пријатели од затвор.
„Претходно, истата игра ја одиграа и за архитектот на маките на Албанците, поранешниот директор на УБК, Сашо Мијалков. ДУИ, партија која две децении го манипулира народот со ветувања за реформи и европски интеграции, е убиецот на секоја надеж за правда и подобра иднина. Сите знаат за притисокот на Артан Груби врз претседателката на Врховниот суд за оживување на аболициите на Ѓорге Иванов, наводно за да изврши притисок врз ВМРО-ДПМНЕ за усвојување на уставните измени“,
се вели во соопштението.
Според вториот по големина коалициски партнер во Владата, граѓаните на земјава еднаш засекогаш треба да разберат дека ДУИ никогаш не била за големиот европски сон, туку негов саботер и оти тие се главните виновници за недостатокот на напредок и за оддалечувањето на Северна Македонија од европскиот пат.
„Наместо да се борат за правда и просперитет, тие се бореа само за да ги заштитат своите криминални кланови, без разлика на етничката припадност“,
посочуваат од „Вреди“.
Поранешниот премиер и екслидер на ВМРО-ДПМНЕ, Никола Груевски, нема да ја одлежи двегодишната затворска казна во предметот „Тенк“ бидејќи в петок (4 октомври) поминуваат шест години од правосилноста на пресудата за набавката на луксузниот владин „мерцедес“.
Инаку, контроверзните измени на Кривичниот законик на кој се осврнуваат од „Вреди“ беа донесени лани во Собранието, откако претходно тајно беа усвоени од тогашната влада. Со нив се намалија казните за кривичните дела кои се однесуваат на злоупотреба на службената положба и овластување и злосторничко здружување, што доведе до застарување на делата и ослободување од кривично гонење на повеќе поранешни функционери и нивни блиски соработници против кои се водеа постапки што првично ги започна изгаснатото Специјално јавно обвинителство (СЈО).
Во текот на годините и по измените на Кривичниот законик на Груевски му застареа предметите ТНТ, за уривањето на комплексот „Космос“ и „Траекторија“, за провизиите за изградба на автопатиштата. Измените го спасија Груевски и од обвинението за случајот „Скопје 2014“ и „Феникс“.