Нарекувајќи го изгубено раководството на ДУИ, од „Вреди“ оценија оти опозициската партија не може да го преболи тоа што и лидерот на СДСМ, Венко Филипче, како што велат, ги пуштил низ вода
Не постојат ниту јавни ниту тајни планови за отстранување на Албанците од каде било – велат од владејачката коалиција „Вреди“ во пресрет на лидерската средба на премиерот Христијан Мицкоски и претседателот на СДСМ, Венко Филипче, одговарајќи на обвинувањата на ДУИ дека на средбата наводно ќе се разговара за план за отстранување на Албанците од секое ниво на власт во државата.
„Постои само патолошки страв на ДУИ од правосудна одговорност за нивните поранешни функционери кои со децении се богатеа на грбот на албанскиот народ, кого јавно го лажеа со големоалбански приказни, а тајно ги полнеа џебовите со криминални дилови со Груевски и Мијалков. Овие антиалбански политики на ДУИ ќе бидат жестоко казнети, бидејќи нашиот народ нема да дозволи некој да ги држи во заложништво само затоа што разгалените фотелјаши не се научени да седат во опозиција“,
велат од „Вреди“.
Нарекувајќи го изгубено раководството на ДУИ, од „Вреди“ оценија оти опозициската партија не може да го преболи тоа што и лидерот на СДСМ, Венко Филипче, како што велат, ги пуштил низ вода.
„Откако секојдневно се координираа како политички да профитираат од колективната трагедија во Кочани, сега Бујар Османи, како лице задолжено за контакт со СДСМ, емоционално изневерен што плановите им се разоткриени, повторно ја заврти истата бајата грамофонска плоча. Наместо да ја прозиваат коалицијата ВЛЕН, ние уште еднаш ги повикуваме да престанат да шират лаги и манипулации со цел да ги оправдаат плановите за бојкот на локалните избори како обид да предизвикаат политичка криза. Конечно, треба да разберат дека токму заради нивното криминално владеење ВМРО-ДПМНЕ освои 58 пратеници на ланските парламентарни избори“,
додаваат од владејачката коалиција на партиите на Албанците.
Претходно денеска ДУИ обвини дека на денешната лидерска средба меѓу Мицкоски и Филипче ќе биде демонстрирана моноетничка коалиција, која, според опозициската партија, има за цел да го преобликува политичкиот модел на државата од мултиетничка во моноетничка демократија.