Фирма чиј сопственик е внук на сопругата на пратеникот Елми Азири земала тендери од Општина Липково, од средното училиште „Исмет Јашари“ во Липково, од гимназијата „Сами Фрашери“ во Куманово и ЈЗУ Здравствен Дом – Куманово, соопштија од коалицијата „Вреди“
Коалицијата „Вреди“ трет ден продолжува со објавување на информации за наводни афери на фирми поврзани со семејството на пратеникот Елми Азири од Европскиот фронт. На денешната прес-конференција во партиското седиште, Бујаре Абази обвини дека фирмите блиски до семејството на Азири добиле четири тендери во Општината Липково за кои наплатиле еден милион денари, односно нешто повеќе од 16 илјади евра.
„Фирма, чиј сопственик е внук на сопругата на пратеникот Елми Азири земала тендери од Општина Липково, од средното училиште „Исмет Јашари“ во Липково, од гимназијата „Сами Фрашери“ во Куманово и ЈЗУ Здравствен Дом – Куманово“,
рече Абази.
Токму истата фирма, според Абази, добила и неколку тендери од Министерството за политички систем и односи со заедниците во времето кога на чело на министерството бил како што изјави „главниот логистичар на ДУИ“, Артан Груби.
„Овие информации јасно покажуваат дека без разлика дали се работи за набавки од помала или поголема вредност, без амин на ДУИ ниту една фирма не може да добие ниту денар. Очигледно е дека ДУИ владеел како мафијашка структура која не се воздржувала да ги злоупотребува народните пари за остварување политичко влијание“,
кажа Абази.
Таа вели и дека го охрабруваат раководството на опозицискиот Европски фронт добро да објасни на своето членство зошто нивните клучни функционери, Али Ахмети и Зијадин Села се под сомневање за политичка корупција и оти во мрежата на ДУИ, се фаќале сите политичари кои политиката ја разбираат единствено како можност за лично и семејно богатење.