„Албанската академија е исклучиво научен проект, што има за цел да ја унапреди академската мисла. Албанските интелектуалци се систематски дискриминирани во МАНУ, тие немаат простор каде да дејствуваат. Поради тоа, ние бевме принудени да создадеме платформа што ќе овозможи развој на научната мисла“, велат од коалицијата
Апелираме до сите политички партии, наместо да критикуваат, да се охрабрат и да дадат поддршка и преку инклузивна дебата да се најде правично решение за претставувањето на Албанците во највисоките академски кругови. Ова е денешното соопштение од коалицијата „Вреди“, за формирањето на академијата на науките на Албанците, чие финансирање вчера го најавија градоначалниците на Тетово, Гостивар, Желино и Чаир.
„Албанската академија е исклучиво научен проект, што има за цел да ја унапреди академската мисла. Албанските интелектуалци се систематски дискриминирани во МАНУ, тие немаат простор каде да дејствуваат. Поради тоа, ние бевме принудени да создадеме платформа што ќе овозможи развој на научната мисла“,
се вели во соопштението од „Вреди“.
Посочија дека МАНУ покажува инертност за реформи и одбива да ја прифати сегашната фактичка состојба, па затоа албанските интелектуалци се принудени да создадат платформа што нема да работи според политички или етнички критериуми, туку само врз основа на науката.
„Во 21 век е неприфатливо да има противење на научните трудови и на унапредување на знаењето“,
велат од коалицијата.
Според „Вреди“, не можат да прифатат логиката на двојна негација, каде МАНУ не ги отвора целосно вратите за Албанците, а истовремено се проблематизира основање на Албанска академија.
Градоначалниците на Тетово, Гостивар, Желино и Чаир, од редовите на владејачката коалиција „Вреди“, вчера најавија поддршка од секаков можен аспект, пред сè финансиска, за Здружението на граѓани „Академско здружение за науки и уметности на Албанците“. Целта на ваквата поддршка, според нив, е да се забрза динамиката за институционализација на оваа организација.
Премиерот Христијан Мицкоски денеска рече дека советниците во тие општини од редовите на ВМРО-ДПМНЕ немаат намера, ниту пак ќе гласаат во рамките на советите. Претходно и лидерот на СДСМ Венко Филипче рече дека партијата со сите расположливи механизми ќе се спротивстави во општините кои најавија дека ќе го финансираат овој проект.
На 27 јули во јавноста одекна веста дека партнерот во Владата, коалицијата „Вреди“, ќе поддржи формирање Албанска академија на науките и уметностите во земјава. Пораката дојде од Тетово, каде на средба со група професори, лидерите на „Вреди“ порачаа дека е време да се покаже интелектуалниот капацитет на Албанците во земјава.