„Исклучувањето на Артан Груби од партијата е неопходен потег за да се испрати јасна порака дека партијата и нејзините лидери се искрени во заложбите за почитување на законите и силно партнерство со САД. Сè друго е јасен доказ дека тие го прикриваат и штитат нивниот другар Артан Груби“, велат од коалицијата на партиите на Албанците кои се дел од власта
Коалицијата „Вреди“ бара нивниот политички ривал Демократската унија за интеграција (ДУИ) да донесе формална одлука за исклучување на Артан Груби од членство во партијата.
Со ваквиот отворен повик коалицијата на партии на Албанците што се дел од власта го повикуваат раководството на ДУИ да преземе конкретни и видливи мерки за зачувување на стратешкото партнерство на Албанците од Северна Македонија со Соединетите Американски Држави и за докажување дека Албанците нема да бидат заложници на ничиј криминал.
„Исклучувањето на Артан Груби од партијата е неопходен потег за да се испрати јасна порака дека партијата и нејзините лидери се искрени во заложбите за почитување на законите и силно партнерство со САД. Сè друго е јасен доказ дека тие го прикриваат и штитат нивниот другар Артан Груби“,
се вели во соопштението од „Вреди“.
Од коалицијата директно ги прозиваат лидерот на ДУИ, Али Ахмети, и потпретседателот на партијата, Бујaр Османи, за чии досегашни изјави во врска со Груби велат дека останале само на ниво на празни зборови.
„Ги повикуваме да преземат конкретни чекори, кои ќе покажат дека нивните ветувања и заложби се реални и дека нема да дозволат какви било сомнежи околу криминална или нечесна активност да ја нарушат репутацијата и иднината на Албанците во Република Северна Македонија. Притисокот од јавноста е реален и легитимен – луѓето бараат дела, а не празни фрази. Доколку ДУИ сака да ја потврди сериозноста на своите заложби за владеење на правото и за севкупен општествен интегритет, неопходно е итно да покаже дека нема да толерира сомнителни активности во своите редови“,
велат од „Вреди“.
Груби, кој речиси еден месец е во бегство, е еден од осомничените во случајот „Лотарија“, што Обвинителството го отвори кратко откако ексвицепремиерот и висок функциоинер на ДУИ беше ставен на „црната листа“ на САД, но за сосема друг случај. Груби и апелацискиот судија од Скопје, Енвер Беџети, се најдоа на непопуларната листа на американскиот Стејт департмент поради примање мито за да застари предметот „Таргет-Тврдина“ во кој првообвинет беше поранешниот директор на УБК, Сашо Мијалков.
Груби на 15 декември замина за Косово, непосредно пред да биде објавена акцијата за „Лотарија“ и оттогаш е недостапен за органите на прогонот. Тој и ексдиректорот на „Државна лотарија“, Перпарим Бајрами, кој е осомничен во истиот случај, се бараат со меѓународни потерници што ги распиша МВР по наредба на Обвинителството за гонење организиран криминал и корупција (ОЈО ГОКК).
Откако се најде на „црната листа“, Груби преку социјалните мрежи информира дека се повлекува од јавниот живот и дека за тоа го информирал партискиот лидер, Ахмети. Наведе дека е „чист како солза“ и оти одлуката ја донел за мир на неговото семејство и зачувување на личниот интегритет.
Од ДУИ досега не излегоа со официјално соопштение дека Груби е исклучен од партијата. Најблиску до тоа беа изјавите што за дел од медиумите ги дадоа партиски функционери. За ТВ 24 од ДУИ рекоа дека ексвицепремиерот веќе не е дел од ДУИ, а истото за ТВ 21 го кажа координаторот на пратеничката група на партијата во Собранието, Блерим Беџети.
Овие наводи главно дојдоа како одговор, односно избегнување одговор на прашањето за актуелната локација на Груби. Тоа, пак, беше подгреано со изјавите на актуелниот прв вицепремиер Изет Меџети и на лидерот на ДУИ, Али Ахмети. Првиот во гостување за албанска телевизија кажа дека Груби не е во Косово, туку во Албанија, а вториот, пак, за косовските медиуми рече дека ексвицепремиерот е добро и се наоѓа на „албанските територии“.
И првиот вицепремиер и опозиционерот Ахмети избегнаа да ги потврдат ваквите наводи за домашните медиуми.
Инаку, од „Вреди“ денешното соопштението со кое бараат ДУИ и формално да го исклучи Груби од партијата, го завршуваат со порака дека тие стојат зад сите иницијативи кои ќе доведат до поголема отчетност и одговорност на политичките актери во земјата.
„Веруваме дека со итно и решително делување, ДУИ ќе покаже дека зборовите на Али Ахмети и Бујар Османи не се празни ветувања, туку дека навистина стојат зад сопствените принципи за праведност, законитост и заштита на стратешките интереси на Албанците во Република Северна Македонија“,
порачуваат од коалицијата „Вреди“.
За потсетување, Артан Груби доби отказ од Правниот факултет при Државниот универзитет во Тетово, каде што ја извршуваше функцијата доцент на отсекот по новинарство. Деканот на Правниот факултет, Сафет Емурли, вчера во изјава за МИА информира дека до Груби е доставено отказното решение, кое беше иницирано поради негово неоправдано отсуство од работното место.