Според народниот правобранител повредени се повеќе членови од ратификуваните меѓународни конвенции. Од канцеларијата на омбудсманот очекуваа надлежните институции да преземат мерки и најстрого да ја казнат вработената
Вработена во Домот за доенчиња и мали деца во Битола за време на работа во алкохолизирана состојба врзала едно од децата во вреќа за спиење за кревет, а другите ги запоставила, констатирал Народниот правобранител, постапувајќи по предмет по сопствена иницијатива по непосреден увид во установата.
Омбудсманот соопшти дека во разговор со директорот и правникот на домот, како и по увидот во документацијата за настанот, наводите се потврдени односно констатирано е дека вработената била пијана и дека едно од децата било во вреќа за спиење, која била врзана за кревет, со што детето не можело да се движи. Раководството на установата веќе преземало соодветни дејствија и отпочнати се постапки кон вработената.
Според народниот правобранител со ваквиот однос на вработената се повредени повеќе членови од ратификуваните меѓународни конвенции.
„Имено според член 3 од Конвенцијата за правата на детето, е наведено дека во сите активности кои се однесуваат на децата, од примарно значење се интересите на детето, без оглед на тоа дали ги спроведуваат јавните или приватните институции за социјална заштита, а државите потписнички се обврзуваат на детето да му обезбедат таква заштита и грижа кои се неопходни за неговата благосостојба, а исто така се грижат сите институции, служби и установи кои се грижат за заштита на децата да бидат во согласност со стандардите што ги имаат утврдено надлежните органи, особено во областа на сигурноста и здравјето, бројот и достојноста на персоналот, како и стручниот надзор“,
појаснуваат од канцеларијата на народниот правобранител.
Понатаму, додаваат, повреден е и членот 7 од Конвенцијата за правата на лицата со попреченост. Овој член наложува при преземањето на сите акции во однос на децата со попреченост, како примарна грижа да се зема предвид најдобриот интерес на детето, а членот 15 ги обврзува државите потписнички да преземат ефективни законски, административни, судски или други мерки за да се спречи лицата со попреченост да бидат изложени на тортура или суров, нечовечки или понижувачки третман или казна.
Омбудсманот очекува надлежните институции да преземат мерки и најстрого да ја казнат вработената.
Од канцеларијата укажуваат и дека треба да се зајакнат критериумите, но и да се води грижа за начинот на селекција на лицата кои се вработуваат во установи и други форми на згрижување на деца и деца/лица со попреченост.
Апелот од народниот правобранител е редовно да се прави контрола во ваквите установи како и во малите групни домови, а предлага и континуирано да се усовршуваат знаењата и познавањата на вработените за грижата за децата.