За случајот, како што информираат од МВР, е известен јавен обвинител и во тек е увид на местото на настанот
Три лица се тешко повредени во сообраќајна несреќа што денеска претпладне се случила на скопската обиколница, кога возилото со кое патувале, од засега непознати причини, се превртело на коловозот.
Како што информираат од Министерството за внатрешни работи (МВР), возачот и уште двајца сопатници се хоспитализирани во болницата „Св. Наум Охридски“ и Комплексот клиники „Мајка Тереза“, каде што им се констатирани тешки телесни повреди.
Во возилото имало уште еден сопатник, кој, според полицијата, имал телесни, односно полесни повреди.
„Денеска (05.04.2025) во СВР Скопје било пријавено дека на обиколницата во Скопје, патничко возило ‘бмв’ со скопски регистарски ознаки се превртело на коловозот. Во несреќата со тешки телесни повреди се здобил возачот, констатирани во Градската општа болница ‘Св. Наум Охридски’ во Скопје, како и неговите сопатници Б. Н. и Г. Е., констатирани во Комплекс клиники ‘Мајка Тереза’ во Скопје. Со телесни повреди се здобил еден сопатник, на кој му е укажана помош во ГОБ ‘8 Септември’“,
се вели во информацијата од МВР.
За случајот, како што додаваат оттаму, известен е јавен обвинител и во тек е увид на местото на настанот.