САД утврдија дека Русија врши злосторства против човештвото во Украина, ова денеска го изјави потпретседателката Камала Харис, што е најнов во серијата обиди на Западот да ја повика Москва на одговорност за злосторства направени во текот на едногодишната војна во Украина.
Во обраќањето на Минхенската безбедносна конференција, Харис изјави дека Русија е одговорна за „широк и систематски напад“ врз цивилното население во Украина, наведувајќи докази за убиства, егзекуции, силувања, тортура и насилни депортации.
„Нивните постапки се напад на нашите заеднички вредности, напад на нашата заедничка човечност“,
рече потпретседателката, покажувајќи фотографии од тела кои лежат на улиците на Буча.
„САД формално утврдија дека Русија извршила злосторства против човештвото“,
изјави Харис.
Таа најави дека администрацијата на претседателот Бајден ќе продолжи да ѝ помага на Украина во истрагите за овие злосторства.
„Сторителите и нивните претпоставени ќе одговараат. Сите да се согласиме, во име на сите жртви, познати и непознати, дека правдата мора да биде задоволена“,
порача Харис од говорницата во Минхен.