ЈП „Комуналец“ на својата фејсбук-страница велат дека според анализите од лабораторијата на Јавната здравствена установа – Скопје за бактериолошката и физичко-хемиската состојба на водата, потврдено е дека водата е безбедна за пиење
Откако минатата недела Агенцијата за храна и ветеринарство (АХВ) издаде наредба за забрана за пиење на водата од градскиот водовод во Гостивар бидејќи по направени лабораториски испитувања во неа било детектирано зголемено присуство на манган, сега Јавното претпријатие „Комуналец“ издаде известување дека водата е безбедна за конзумирање.
„Водата во град Гостивар е безбедна за консумирање. Според анализите од лабораторијата на Јавната здравствена установа – Скопје за бактериолошката и физичко-хемиската состојба на водата, потврдено е дека водата во нашиот град е безбедна за пиење“,
се вели во соопштението од ЈП „Комуналец“ – Гостивар објавено на нивната фејсбук-страница.
АХВ минатата недела му наредила на јавното комунално претпријатие „Комуналец” во Гостивар да ги извести граѓаните за забраната и да обезбеди пивка вода за пиење.
Од Агенцијата во неделата информираа дека поради контаминација предизвикана од обилните врнежи од дожд, најновите физичко-хемиски и микробиолошки анализи потврдиле дека водата од јавната водоводна мрежа во моментов не е безбедна за пиење и оти граѓаните не треба да ја користат додека не добијат ново известување.