Во Цетиње и ширум Црна Гора вечерва се палеа свеќи во чест на жртвите од масакрот

Свеќи во чест на жртвите запалија и претседателот на Црна Гора, Јаков Милатовиќ, со сопругата Милена

Во Цетиње и ширум Црна Гора вечерва граѓани палеа свеќи, оддавајќи им почит на дванаесеттемина загинати во вчерашното масовно убиство во Цетиње. Кај споменикот Вила на Цетиње вечерва во 17 часот започна собирот на кој граѓани палеа свеќи и оставаа цвеќе и играчки во чест на жртвите, од кои две се деца.

Собир имаше и во Подгорица каде што неколку стотици граѓани се собраа на Плоштадот на незавосноста за да им оддадат почит на жртвите. Таму свеќи запалија и претседателот на Црна Гора, Јаков Милатовиќ, со сопругата Милена. Во центарот на Подгорица граѓани се потпишуваа во отворената книга на жалост.

Освен во Цетиње и во Подгорица, собири се одржаа и во Никшиќ, Плевља, Бијело Поље, Херцег Нови и други.

• Масакрот во Цетиње бил извршен за половина час, осомничениот убиец усмртил пријатели и блиски членови на семејството

Од денеска до 4 јануари знамињата во Црна Гора ќе бидат спуштени на половина копје бидејќи црногорската влада прогласи тридневна жалост поради трагедијата во Цетиње.

• Две масовни убиства во Цетиње за помалку од две и пол години