Во тешка состојба се 14-те хоспитализирани во нашите болници, петмина од нив се интубирани – велат од бугарското Министерство за здравство

Од Амбасадата на Република Бугарија во Скопје вчеравечер соопштија дека Бугарија е подготвена да им обезбеди превоз и сместување на членовите на потесните семејства на повредените во пожарот во дискотеката во Кочани кои се испратени на лекување во Софија, Пловдив и Варна

Состојбата на 14-те повредени пациенти што се хоспитализирани во неколку болници во Бугарија е тешка, со изгореници и повреди поради вдишување жешки гасови, а петмина од нив се интубирани, соопштија денеска од бугарското Министерство за здравство.

Во Универзитетската мултипрофилна болница за активно лекување и ургентната медицина „Н.И. Пирогов“ во Софија примени се осум пациенти, од кои тројца се малолетни на возраст од 15 и 16 години. Другите петмина се на возраст од 19 до 31 година. Петмина од нив се интубирани.

Во Мултипрофилната болница за активно лекување во Варна при Воената-медицинска академија се хоспитализирани тројца повредени на возраст од 17, 20 и 15 години. Двајца од нив се на апарат за механичка вентилација.

Во УМБАЛ „Св. Георги“ во Пловдив примени се тројца пациенти на возраст 19, 21 и 49 години, со изгореници од втор и трет степен, како и со повреди поради вдишување жешки гасови.

Како што објави бугарското Министерство за здравство, на својот фејсбук-профил, информации за здравствената состојба на повредените ќе бидат достапни за нивните блиски во следните термини:

УМБАЛСМ „Пирогов“ (Софија) – во 8 часот и 13:30 часот пред Одделот за реанимација на Клиниката за изгореници (втор кат).
МБАЛ – Варна при ВМА – во 9 часот и 12 часот.
УМБАЛ „Св. Георги“ – Пловдив – од 8:30 часот до 9 часот и од 17 часот до 17:30 часот.

Обезбедена е и 24-часовна телефонска линија за информации за болниците каде што се сместени повредените.

Телефонскиот број е +359 2 8050 300.

„Пирогов“: Сите пациенти од Кочани, освен едно дете, се во тешка состојба

Од Амбасадата на Република Бугарија во Скопје вчеравечер соопштија дека Бугарија е подготвена да им обезбеди превоз и сместување на членовите на потесните семејства на повредените во пожарот во дискотеката во Кочани кои се испратени на лекување во Софија, Пловдив и Варна.

Ќе обезбедиме превоз и сместување за семејствата на повредените што се лекуваат во Бугарија, информираат од Амбасадата во Скопје

Во Македонија се лекуваат 84 пациенти, а во странство има 51 пациент, вкупно повредени се 135 пациенти, информираше денеска министерот за здравство Арбен Таравари.