Во тешка сообраќајна несреќа, која се случила синоќа во Скопје, загина македонската кошаркарска легенда Благоја Георгиевски- Буштур, објави Кошаркарската федерација.
Несреќата се случила во скопската населба Кисела Вода, кај сервисот „Скендеровски“. Според првичните информации, Георгиевски возел со непрописна брзина и поради влажниот коловоз изгубил контрола над возилото, излетал од патот и удрил во бетонските блокови поставени покрај булеварот.
Благоја Георгиевски е роден на 15 октомври во Скопје. Најголем дел од својата играчка кариера ја помина во кошаркарскиот клуб „Работнички“ со кој се натпреваруваше во Првата југословенска кошаркарска лига.
Георгиевски беше и член на младинската репрезентација на Југославија. А со таа селекција, предводена од Лазар Лечиќ, Буштур ја освои Балканијадата во Ријека одржана во 1970 година. За време на Младинското европско првенство во Атина, нашиот кошаркарски великан го освои четвртото место.
Георгиевски беше учесник и на Летните олимписки игри во 1976 година кои се одржаа во Монтреал. Како составен дел на популарните „сини“, Буштур стигна до олимпиското сребро, што е најголемиот резултат на еден македонски кошаркар во историјата на овој спорт.
По осамостојувањето, Георгиевски работеше и како тренер. Беше и селектор на македонската сениорска репрезентација
Беше член на управниот одбор и на Собранието на Македонскиот олимписки комитет, претседател на Олимпискиот совет при МОК, а беше и потпретседател на највисоката спортска институција во нашата земја.
Член е на Клубот на великаните на Македонскиот олимписки комитет од 1997 година.