По 13. состанок во април, македонскиот копретседавач изјави дека последните три средби завршиле без поместување на позициите на бугарската страна, за што како причини ги наведе изборната кампања во Бугарија и отсуството на политичка влада. Новиот 14. состанок, кој почнал вчера, пак, се одржува по изборот на привремената влада во Софија и по заедничкото патување во Рим на претседателите на двете земји
Во тек е онлајн состанок на тимовите од македонска и од бугарска страна во мешовитата историска комисија, потврдија оттаму за „360 степени“.
По завршувањето на состанокот, се очекува да биде објавено соопштени за исходот од разговорите во оваа фаза меѓу историчарите од двете земји.
Медиуми во Софија јавија дека бугарскиот копретседавач на Заедничката мултидисциплинарна експертска комисија за историски и образовни прашања, Ангел Димитров, ќе даде изјава за медиумите во 17 часот по локално време во зградата на бугарското МНР, а по 14-тиот состанок на Комисијата, одржан преку видеоврска на 10 и 11 јуни 2021 година.
На 13. состанок на Комисијата, кој се одржа во април, се разговараше за македонските учебници за седмо одделение, додека темата за Гоце Делчев, како што беше соопштено, воопшто не била отворена на барање на бугарската страна. Македонскиот копретседавач Драги Ѓоргиев тогаш изјави дека двете страни останале на истите позиции и дека главна причина што нема резултат е различната перспектива на средновековието, како и големите разлики во пристапот на надминување на ваквиот вид спорови.
Јас мислам дека тој однос кон работата на бугарските колеги на последните три средби е резултат на ситуацијата во Бугарија, предизборната кампања, сега на тоа што нема политичка влада и е воочливо е кај бугарските колеги тоа отсуство на желба да се постигне нешто повеќе во работата“,
изјави тогаш Ѓоргиев.
Новиот состанок, кој почнал вчера, се одржува по изборот на привремената влада во Софија и по заедничкото патување во Рим на претседателите на С Македонија и на Бугарија, Стево Пендаровски и Румен Радев.