Според првичните наоди на Обвинителството, до несреќата дошло при директен судир на автомобилот „опел корса“ со битолски ознаки, со кој управувал 24-годишникот, и товарно возило со штипска регистрација. При судирот, патничкото возило се запалило, а телото на возачот било опожарено, соопштија од МВР
Дваесет и четиригодишно момче го загуби животот во тешката сообраќајна несреќа што утринава се случи на патот Прилеп-Ресен, кај местото викано Кукречанска Раскрсница, во близина на Битола, соопштија од Основното јавно обвинителство Битола по извршениот увид на местото на несреќата.
Според првичните наоди на Обвинителството, до несреќата дошло при директен судир на автомобилот „опел корса“ со битолски ознаки, со кој управувал 24-годишникот, и товарно возило со штипска регистрација.
При судирот, патничкото возило се запалило, а телото на возачот било опожарено, соопштија од МВР.
„Денеска (24.07.2023) во 05.08 часот во СВР Битола било пријавено дека се случила сообраќајна несреќа помеѓу товарно моторно возило ‘сканиа’ со прилколка со штипски регистарски ознаки, управувано од Б.М. (44) и патничко моторно возило ‘опел корса’ со битолски регистарски ознаки. Во несреќата, патничкото возило се запалило, а телото на возачот било опожарено“,
информираат од Министерството за внатрешни работи.
Телото на починатото момче, по наредба на Обвинителството, е дадено на обдукција.
Во меѓувреме, битолското обвинителство постапува за откривање на причините за несреќата, а по наредба на јавен обвинител ќе биде извршено сообраќајно вештачење.