Според БНР, Теодора Генчовска од „Има таков народ“ е кандидатка за нова министерка за надворешни работи
Коалицискиот договор во Бугарија е веќе потпишан. Лидерите на четирите преговарачки групи го потпишаа документот. По тринеделен преговарачки маратон, коалицискиот договор за формирање влада, со мандатот на „Промената продолжува“ сега е факт, јави БНР.
Претседателката на БСП, Корнелија Нинова последна го потпиша документот, на кој во текот на денот потпис ставија копретседавачите на Демократска Бугарија Христо Иванов и Атанас Атанасов, а лидерот на „Има таков народ“ Слави Трифонов го потпиша во својата партиска канцеларија, објаснија мандатарите Кирил Петков и Асен Василев.
„Договорот штотуку го потпишаа сите наши коалициски партнери. Она што го гледате пред вас е за првпат во современата историја на Бугариј. Таков детален документ за сите можни политики, на 140 страници, навистина ќе овозможи оваа коалиција да биде силна и да работи долго време, бидејќи има детални политики, има детални очекувања и секој министер од оваа влада ќе треба да се занимава со овие задачи“,
изјави Петков доцна попладнево за БНР.
Како што се најавува, бугарскиот претседател Румен Радев, утре претпладне ќе го врачи мандатот за формирање влада, по што се очекува веднаш да биде возвратено со список на имиња на министри во новиот кабинет.
Според БНР, Теодора Генчовска од „Има таков народ“ е кандидатка за нова министерка за надворешни работи. Во двата обиди на ИТН да формира влада, таа беше предлог за министерка за одбрана.